რა ხდება: მას შემდეგ, რაც პარლამენტის თავმჯდომარემ ხელი მოაწერა რუსულ კანონს, დოკუმენტი, პროცედურის მიხედვით, საკანონმდებლო მაცნეს ვებგვერდზე გამოქვეყნდა.

დეტალები: შალვა პაპუაშვილმა დღეს განაცხადა, რომ კანონს ხელი უკვე მოაწერა.

  • მან თქვა, რომ ეს არის "ქართული კანონი":
  • "დაცხრა ემოციები და რადიკალური ოპოზიციის პროტესტს მიერთებული მოქალაქეებიდან ბევრმა უკვე დაინახა, რომ, სინამდვილეში, გამჭვირვალობის კანონი გაზრდის არასამთავრობო ორგანიზაციების და მათი დამფინანსებლების პასუხისმგებლობასა და ანგარიშვალდებულებას, გააჯანსაღებს პოლიტიკურ სისტემას, შეასუსტებს დეზინფორმაციას, შეამცირებს რადიკალიზმს და პოლარიზაციას", — თქვა შალვა პაპუაშვილმა.

კონტექსტი: მას შემდეგ, რაც რუსული კანონი მმართველმა პარტიამ კვლავ დააინიციირა, საქართველოში უწყვეტად მიმდინარეობს პროტესტი, დაკავებებისა და ძალადობის ფონზე.

  • საქართველოს უცხოელმა პარტნიორებმა არაერთხელ განაცხადეს, რომ ეს კანონი ძირს უთხრის დემოკრატიას და ქვეყანას აშორებს ევროკავშირის გზიდან.
  • ამის მიუხედავად, ქართული ოცნების ლიდერები ამბობენ, რომ კანონი საქართველოში პოლარიზაციას შეამცირებს, 2030 წლისთვის კი ჩვენი ქვეყანა ევროკავშირის წევრი იქნება.