სომხეთის პოლიციის მიერ აქციის ძალადობრივი დარბევა და 300-მდე მომიტინგის დაკავება, ასევე, ოპოზიციონერ დეპუტატზე თავდასხმა დაგმო ქვეყნის უფლებადამცველი ორგანიზაციების ჯგუფმა.

ერთობლივ განცხადებაში, ხუთმა წამყვანმა ადგილობრივმა უფლებადამცველმა ორგანიზაციამ დაგმო "სამართალდამცავი ორგანოების მხრიდან ძალადობის ყველა შემთხვევა". ისინი ყველა ცალკეული დარღვევის საქმეზე, ხელისუფლებისგან, დამოუკიდებელი გამოძიების ჩატარებას მოითხოვენ.

"პოლიციის მიერ ამგვარი მეთოდების გამოყენება სისტემაში ხანგრძლივი დაუსჯელობის პოლიტიკის შედეგია", — ნათქვამია განცხადებაში.

პოლიციამ ანტისამთავრობო ტავუშის მოძრაობის მიერ ორგანიზებული აქციები დაარბია ერევანსა და ქვეყნის სხვა ქალაქებში.

ასევე, ნახეთ: არქიეპისკოპოსმა გალსტანიანმა მღვდელმსახურება შეიჩერა, რათა სომხეთის პრემიერ-მინისტრობისთვის იბრძოლოს

მოძრაობამ განაცხადა, რომ ჩაატარებდა სამოქალაქო დაუმორჩილებლობის აქტებს მთელი ქვეყნის მასშტაბით, პოლიციამ გამოიყენა ცრემლსადენი გაზი მომიტინგეების დასაშლელად.

"პროტესტის მონაწილეთა არასათანადო ქცევა ვერანაირად ვერ გაამართლებს პოლიციელების უკანონო ქმედებებს“, — განაცხადეს უფლებადამცველმა ორგანიზაციებმა.

მათ, ასევე, მოუწოდეს მთავრობას, გამოიძიონ სომხეთის ალიანსის ოპოზიციონერი დეპუტატის აშოტ სიმონიანის ძალადობრივი დაკავებაც.

სოციალურ მედიაში გავრცელდა კადრები, სადაც ჩანს სიმონიანი სპეცრაზმელების ალყაში. მას სცემენ და ურტყამენ.

შინაგან საქმეთა სამინისტრომ მოგვიანებით განაცხადა, რომ მომხდარზე გამოძიება დაიწყო და პოლიციელი თანამდებობიდან გაათავისუფლეს.

ორგანიზაციებმა, ასევე, მოითხოვეს განმარტება, თუ რატომ განათავსა შინაგან საქმეთა სამინისტრომ "დიდი რაოდენობით პოლიციელები" ოპოზიციური სომხური რევოლუციური პარტიის ოფისთან. პარტია სომხეთის ალიანსის წევრია.

მიუხედავად იმისა, რომ დეპუტატებმა მმართველი პარტია სამოქალაქო კონტრაქტიდან აღიარეს სიმონიანზე თავდასხმა, ისინი ამტკიცებდნენ, რომ დეპუტატმა, სიტყვიერი შეურაცხყოფით, სამართალდამცველების პროვოცირება მოახდინა.

"როდესაც პოლიციელს პირად შეურაცხყოფას აყენებენ, ისინი ფსიქოლოგიურად ვერ იცავენ თავის ღირსებას და კონტროლს კარგავენ", — განაცხადა მმართველი პარტიის დეპუტატმა მარია კარაპეტიანმა. "მე ასე ვხედავ სიტუაციას და ვფიქრობ, რომ ამ მიმართულებით უნდა ვიმუშაოთ, მიუღებელია, პოლიციელმა საკუთარ თავზე კონტროლი არ უნდა დაკარგოს".

პოლიცია დაიცვა მმართველი პარტიის კიდევ ერთმა დეპუტატმა, არტურ ჰოვანისიანმა. მან თქვა, რომ ოპოზიციონერმა დეპუტატმა თავს უფლება მისცა დამდგარიყო პოლიციელის პირისპირ, თვალებში ჩაეხედა მისთვის და "მიეყენებინა შეურაცხყოფა".

სამართალდამცველების ქმედებები გაამართლა პოლიციის უფროსმა, არამ ჰოვჰანისიანმაც.

"ვნახოთ, თუკი რამე მოხდა, რა იყო ამისი მიზეზი", — თქვა მან ჟურნალისტებთან და აღნიშნა, რომ სამინისტროში მიმდინარეობდა გამოძიება და თუ ვინმეს ბრალეულობა გამოიკვეთებოდა, დაისჯებოდა.

ინციდენტზე ხელისუფლების პასუხი გააკრიტიკეს ადამიანის უფლებადამცველმა აქტივისტებმა, მათ თქვეს, რომ სიმონიანის მიერ პოლიციელების შეურაცხყოფასა და დეპუტატზე სამართალდამცველების თავდასხმას შორის ტოლობა არ უნდა დაისვას.

"ერთ შემთხვევაში მოქალაქის ქმედებასთან გვაქვს საქმე, მეორეში კი — სპეცდანიშნულების რაზმთან, რომელიც პროფესიულ მოვალეობას ასრულებს", — წერს აქტივისტი ზარა ჰოვანნისიანი ფეისბუქზე.

მან დასძინა, რომ პოლიცია ხელფასს მოსახლეობის გადასახადებიდან იღებს, მაგრამ "სამწუხაროდ, ამჟამინდელი ხელმძღვანელობის მიმართ უპირობო ლოიალობას გამოხატავს“.

საერთაშორისო ორგანიზაციები აკრიტიკებენ სომხეთის ხელისუფლების მხრიდან ძალადობრივი მეთოდების გამოყენებას, მათი კრიტიკოსებისა და ჟურნალისტების მიმართ, ბოლო თვეების განმავლობაში.

სომხეთის შესახებ ბოლო ანგარიშში Freedom House-მა აღნიშნა, რომ პოლიციის მიერ ძალადობის შემთხვევები გაიზარდა.

"პოლიციის მიზანმიმართული ძალადობა ჟურნალისტების მიმართ" დაგმო, ასევე, ორგანიზაციამ რეპორტიორები საზღვრებს გარეშე.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.