რა ხდება: საქართველოს ხელისუფლების მიერ რუსული კანონის საბოლოო მიღებასთან დაკავშირებით 11 ამერიკელი სენატორი განცხადებას ავრცელებს. "შავი დღეა ქართული დემოკრატიისთვის", — ამბობენ ისინი და აღნიშნავენ, რომ ღრმად იმედგაცრუებულები არიან საქართველოს პარლამენტის მიერ, "რუსული სტილის უცხოური აგენტების კანონპროექტის მიღებით."

• განცხადება ორპარტიულია და ავტორები არიან სენატორები როგორც რესპუბკლიკელებიდან, ასევე, დემოკრატებიდან.

სენატორების განცხადებაში ნათქვამია, რომ კენჭისყრა გაიმართა ასობით ათასი ქართველის სურვილების დარღვევით, რომლებიც აგრძელებენ მშვიდობიან პროტესტს კანონპროექტის წინააღმდეგ, რომელიც არა მხოლოდ სიტყვის თავისუფლების შეზღუდვისთვის იქნება გამოყენებული, არამედ საქართველოში დემოკრატიის წინსვლას შეაფერხებს.

განცხადებიდან: "ეს კანონი, რომელიც მოითხოვს, რომ ყველა ორგანიზაციამ, რომელიც თავიანთი ბიუჯეტის 20%-ზე მეტს საზღვარგარეთიდან იღებს, უცხოურ აგენტებად დარეგისტრირდნენ, ჩაახშობს სამოქალაქო საზოგადოების მნიშვნელოვან მუშაობას ქვეყანაში, სადაც მწირი დაფინანსებაა. ამ კანონის მიღება ფუნდამენტურად შეცვლის საქართველოს აშშ-სთან ურთიერთობებს და ევროკავშირში წევრობის მისწრაფებებს დააზიანებს."

ამავე თემაზე: "თუ ეს კანონმდებლობა საბოლოოდ მიიღება, ეს გვაიძულებს ფუნდამენტურად გადავაფასოთ ჩვენი ურთიერთობა საქართველოსთან" — ბაიდენის პრესსპიკერი

სენატორები საუბრობენ მოსალოდნელ სანქციებზეც: "როგორც პრემიერ-მინისტრ კობახიძისადმი წერილში გაფრთხილება გავავრცელეთ, ამ კანონპროექტის მიღება საჭიროს გახდის კონგრესის მიერ აშშ-ის საქართველოს მიმართ პოლიტიკის გადახედვის განხილვას, რათა საქართველოში ახალი პოლიტიკური ლანდშაფტი ასახოს.

• როგორც წინასწარ გაფრთხილება გავავრცელეთ, ეს ზომები შეიძლება მოიცავდეს სანქციებს მათ წინააღმდეგ, ვინც პასუხისმგებელია დემოკრატიისთვის ძირის გამოთხრაზე, ვიზის აკრძალვებსა და ამერიკული პირდაპირი დახმარების გადახედვას.
• როგორც კონგრესის წევრები, რომლებსაც ქართველი ხალხის ღრმა სიყვარული გვაქვს და რომლებიც ვიბრძოდით ძლიერი ორპარტიული და ორმხრივი კავშირებისთვის, ჩვენ გავაგრძელებთ ხალხის მხარდაჭერასა მათი ხმის ამაღლებას — რომელთაგან 79% თანმიმდევრულად უჭერს მხარს ევროკავშირში წევრობას.
• მიუხედავად იმისა, რომ დღეს შავი დღეა, ჩვენ ვინარჩუნებთ ქართველი ხალხის რწმენას, რომლებიც თავიანთი ქვეყნის ნათელი მომავლისთვის იბრძვიან", — წერია განცხადებაში.

ამავე თემაზე: რა გავიგეთ ო'ბრაიენისგან მოსალოდნელ სანქციებზე, მთავრობასთან პირისპირ საუბრებსა და აშშ-საქართველოს ურთიერთობების კარგ და ცუდ პერსპექტივებზე

ორპარტიული განცხადების ხელმომწერები არიან:

• ჯიმ რიში (რესპუბლიკელი),
• ჯინ შაჰინი (დემოკრატი),
• ბენ კარდინი (დემოკრატი),
• კრის კუნსი (დემოკრატი),
• დიკ დურბინი (დემოკრატი),
• როჯერ უიკერი (რესპუბლიკელი),
• ტიმ კეინი (დემოკრატი),
• რიჩარდ ბლუმენთალი (დემოკრატი),
• პიტ რიკეთსი (რესპუბლიკელი),
• ლინდსი გრემი (რესპუბლიკელი)
• ტომ ტილისი (რესპუბლიკელი).

ამავე თემაზე:

[მასალაში გამოყენებულია ინტერპრესნიუსის თარგმანი]