მოკლედ: საფრანგეთში მცხოვრები ქართველი სტუდენტები და კურსდამთავრებულები საერთო წერილს ავრცელებენ, სადაც გმობენ რუსული კანონის საწინააღმდეგო აქციის მონაწილეების დარბევას.

დეტალები: წერილის ავტორები სხვადასხვა უნივერსიტეტის სტუდენტები არიან.

ისინი აღნიშნავენ, რომ ერთხმად აპროტესტებენ მომიტინგეებზე, განსაკუთრებით კი — ახალგაზრდა ქალებზე და მამაკაცებზე ძალადობრივ თავდასხმას და სამართალდამცავების მიერ ძალის არაპროპორციულ გამოყენებას.

მოუწოდებენ ხელისუფლებას სიტუაციის დეესკალაციისკენ და ასევე, მიიჩნევენ, რომ ძალაუფლების ბოროტად გამოყენება უნდა იყოს გამოძიებული და დამნაშავეები — დასჯილი.

  • "ჩვენ ვუერთდებით ევროკავშირის საგარეო საქმეთა და უსაფრთხოების პოლიტიკის უმაღლესი წარმომადგენლის, ჯოზეფ ბორელის მოწოდებას, რომ საქართველოს ხელისუფლებამ უზრუნველყოს მშვიდობიანი შეკრების უფლება.
  • მტრული გეოპოლიტიკური, მძიმე სოციო-ეკონომიკური და პოლიტიკური ვითარების ფონზე, მნიშვნელოვანია რომ ძალების მობილიზება ხდებოდეს ევროინტეგრაციის გზაზე წინსვლისთვის და არა საქართველოს მოქალაქეების კონსტიტუციით მინიჭებული უფლებების შელახვისთვის. ნებისმიერი კანონი თუ კანონპროექტი, რომელიც ძირს უთხრის ჩვენი ქვეყნის ევროკავშირისკენ სწრაფვას, საფრთხეს უქმნის სამოქალაქო საზოგადოებას, ქვეყნის სტაბილურობასა და უსაფრთხოებას, უნდა იყოს უკან გაწვეული", — წერია ქართველი სტუდენტების ერთობლივ განცხადებაში.