17 აპრილს გამოაქვეყნა პრეზიდენტის ოფიციალურმა ვებგვერდმა სალომე ზურაბიშვილის მიერ, გავლენიანი ევროპული მედიასაშუალებებისთვის მიცემული ინტერვიუები.

• ჟურნალისტები მისგან ისმენენ პოზიციებს როგორც რუსულ კანონზე, რომლის მიღებასაც საქართველოს ხელისუფლება უკვე მეორე წელია, დაჟინებით ცდილობს, ასევე, რუსეთზე, საქართველოს მთავრობის პოლიტიკურ კურსსა და ევროინტეგრაციის პერსპექტივაზე.

ამ მასალით On.ge მკითხველს სთავაზობს პრეზიდენტის ინტერვიუების ტექსტურ ვერსიას, რომელთა ქართული თარგმანი პრეზიდენტის ადმინისტრაციამ გაავრცელა.

ინტერვიუ BBC News-თან

ქალბატონო პრეზიდენტო, კეთილი იყოს თქვენი მობრძანება BBC News-ზე. გვითხარით, რატომ ხართ შეშფოთებული ამ შემოთავაზებულ კანონზე.

ეს შემაშფოთებელია, რადგან ეს არის ზუსტად პუტინის კანონის ასლი, რომელიც 2012 წელს იქნა მიღებული და შემდეგ თანდათან გაიზარდა და განვითარდა. ეს არის კანონი, რომელიც არასამთავრობო ორგანიზაციების საქმიანობას ეწინააღმდეგება. ეს არის კანონი მედიის საქმიანობის წინააღმდეგ. და ეს არის კანონი ჩვენი პარტნიორი ქვეყნების, ევროპის ქვეყნების, დიდი ბრიტანეთისა თუ შეერთებული შტატების ყველა საერთაშორისო ორგანიზაციის წინააღმდეგ, რომლებიც ბოლო 30 და მეტი წლის განმავლობაში საქართველოს დამოუკიდებლობას, სახელმწიფო ინსტიტუტების მშენებლობას, ჩვენი ეკონომიკის განვითარებას უჭერენ მხარს. ასე რომ, ეს ძალიან შემაშფოთებელია, ამიტომაც შარშან იგივე კანონი მასობრივი დემონსტრაციების გამო უარყვეს და ვერ მიიღეს. და ამჯერად ამ კანონის გამეორება ქართველი ხალხის პირდაპირი პროვოკაციაა.

პრემიერ-მინისტრი ამბობს, რომ კანონი დაფინანსების მიმღებთა ფინანსური გამჭვირვალობისთვისაა საჭირო. რას იტყოდი ამაზე?

ყველაფერი ძალიან გამჭვირვალეა, რადგან ჩვენ ყველამ ვიცით, რომ ამ საერთაშორისო ორგანიზაციებს, რომლებიც საქართველოს მხარს უჭერენ, ძალიან მკაცრი წესები აქვთ, როდესაც ისინი ორგანიზაციებს აფინანსებენ. ასე რომ, ეს ძალიან ნათელია. არის ვებსაიტები, რომლებზეც ყველას შეუძლია ყველა ამ დეტალის მოძიება. რაც არ არის გამჭვირვალე, არის კორუფცია ხელისუფლების მაღალ დონეზე, არ არის გამჭვირვალე, როგორ მიიღება გადაწყვეტილებები, განსაკუთრებით ეს გადაწყვეტილება კანონის ხელახალი შემოტანის შესახებ, რომელზეც ყველა ჩვენმა ევროპელმა პარტნიორმა თქვა, რომ ჩვენს ევროპულ მომავალს და ინტეგრაციას ეწინააღმდეგება. ვინ გადაწყვიტა, რომ ეს კანონი ხელახლა უნდა შემოღებულიყო? საქართველოში თუ ჩვენს საზღვრებს გარეთ, მოსკოვშია ეს გადაწყვეტილება მიღებული? ესაა მთავარი კითხვა გამჭვირვალობასთან დაკავშირებით, რომელსაც საქართველოს მოსახლეობა სულ უფრო და უფრო ხშირად სვამს. ჩვენ მასობრივი დემონსტრაციების მესამე დღე გვაქვს, მასობრივი და მშვიდობიანი დემონსტრაციების და ხელისუფლებას მოვუწოდებ, არ მიმართონ პირდაპირ, ან ირიბ შევიწროებას.

ქალბატონო პრეზიდენტო, შემდეგი შეკითხვა უკავშირდება იმას, რაზეც ისაუბრეთ — პირები, რომლებიც ქვეყნის გარეთ იმყოფებიან, მათ შორის, ევროკავშირისა და დასავლელი პარტნიორების. როგორ ფიქრობთ, თუ დღეს კანონი ერთ ეტაპს გაივლის, შესაძლოა თუ არა ის შანსები და იმედები, რაც ბევრს აქვს, რომ ერთ დღეს საქართველო ევროკავშირის წევრი გახდება, გაქრეს?

ეს არის კანონი, რომელიც ნათლად აჩვენებს ძალაუფლებაში მყოფი ზოგიერთის განზრახვას დაბრკოლებები შექმნას ჩვენს ევროინტეგრაციის გზაზე. მაგრამ ის, რაც ქუჩაში ხდება აჩვენებს, რომ ხალხს ევროპისკენ წასვლა აქვს გადაწყვეტილი. მთავარი გამოცდა 26 ოქტომბერს არჩევნებთან ერთად მოვა. და ეს კანონი ასევე საშუალებაა, რომ თავისუფალ და სამართლიან არჩევნებს ხელი შევუშალოთ, მაგრამ არა მგონია ეს მოხდეს, რადგან ეს მოსახლეობა საუკუნეების მანძილზე უდრეკად ინარჩუნებს მის დამოუკიდებლობასა და დამოუკიდებელ წარსულს.

ქალბატონო პრეზიდენტო, სანამ დავასრულებთ მინდა გკითხოთ, აპირებთ თუ არა კანონს ვეტო დაადოთ, რადგან თუ ის პარლამენტში ყველა ეტაპს ნამდვილად გაივლის, როგორც ქვეყნის პრეზიდენტს, თქვენ გაქვთ უფლება თქვენი ვეტო გამოიყენოთ.

მე ნამდვილად ვაპირებ ამ კანონს ვეტო დავადო, როგორც ყველა სხვა კანონს, რადგან ეს არ არაა ერთადერთი, ეს არის მთელი სტრატეგია, რომელიც ევროკავშირის რეკომენდაციებს ეწინააღმდეგება, მაგრამ ჩემი ვეტო, რა თქმა უნდა, დაიძლევა, რადგან პარლამენტში არის უმრავლესობა, რომელსაც ჩემი ვეტოს დაძლევის მიზნები აქვს. მაგრამ ჩემი ვეტო ხალხის ხმაა და ეს ხმა ხმამაღლა და ნათლად იქნება გაგონილი.

ინტერვიუ France 24 English-თან

მოგესალმებით ქალბატონო პრეზიდენტო. თქვენ მკაფიოდ აკრიტიკებთ ამ კანონპროექტს. პლატფორმა X-ზე თქვით, რომ ეს არა მხოლოდ ქართველი ხალხის ნებას ეწინააღმდეგება, არამედ მას რუსული კანონიც უწოდეთ და თქვით, რომ ეს დესტაბილიზაციის რუსული სტრატეგიის ნაწილია. ვფიქრობ, ნამდვილად მკაცრად ნათქვამია. გვითხარით, რას ფიქრობთ, რას აკეთებს რუსეთი?

პირველ რიგში, ცხადია, რომ მოსახლეობის 80% ევროპული მომავლის, ევროპული და ევროატლანტიკური ინტეგრაციის მომხრეა, და ეს ასე იყო ბოლო 30 წლის განმავლობაში. ასე რომ, ვინც ქართველი ხალხის ამ ნებას ეწინააღმდეგება, ის წარმოადგენს არა საქართველოს ნებას, არა საქართველოს დამოუკიდებლობას, არამედ სხვა რამეს. როდესაც კანონი, რომელზეცაა საუბარი იმ კანონის ასლია, რომელიც პრეზიდენტმა პუტინმა რუსეთში მიიღო, იმ წარმატებითა და შედეგებით, რაც ვნახეთ - აღარც არასამთავრობო ორგანიზაციები და აღარც ოპოზიცია, ყველაფერი კონტროლირებადი, ეს არაა მომავალი, რომელსაც ქართველი ხალხი მიიღებს. ეს არაა ის მომავალი, რომელსაც მე, საქართველოს მოსახლეობის მიერ და ევროპული პროგრამით არჩეული პრეზიდენტი მივიღებ.

კანონს ვეტოს დავადებ. ვიცი, რომ ვეტო დაიძლევა, მაგრამ მე იქ ვლაპარაკობ, საქართველოს მოსახლეობის ნებას გამოვხატავ, რომელიც ქუჩაშია ნაჩვენები. თუ დააკვირდებით, მოსახლეობას ვინ წარმოადგენს, ეს არსებითად ახალგაზრდა თაობაა, რომელიც დღეს თბილისის ქუჩებშია და ამბობს: „არა რუსეთს“, „არა რუსულ კანონს“.

ამ ყველაფრის საპასუხოდ დღეს კრემლმა განცხადება გაავრცელა. მინდა თქვენი აზრი მოვისმინო ამასთან დაკავშირებით. მოდით მოვუსმინოთ დიმიტრი პესკოვს [ვიდეო]. ქალბატონო პრეზიდენტო, კრემლი ამბობს, რომ ანტირუსული სენტიმენტები საქართველოს ფარგლებს გარედან, გარე აქტორებისგან მოდის. როგორ ფიქრობთ, ვის გულისხმობენ?

არ ვიცი ვის გულისხმობენ. შემიძლია გითხრათ, რომ საქართველოში ანტირუსულ სენტიმენტებს ისინი აძლიერებენ, ვინც ჩვენი ტერიტორიის 20% -ის ოკუპაციას ახდენს და არავინ სხვა. ეს ძალიან ნათელია ქართველებისთვის, ვინ არის მტერი და ვინ პარტნიორი, რომლებიც წლების განმავლობაში მხარს უჭერს საქართველოს დემოკრატიზაციას, ქართულ ინსტიტუტებს, საქართველოს განვითარებას. ძალიან გასაკვირია, რომ ბოლო დღეებში ამ რუსულ კანონს მხარს უჭერენ რუსები მაშინ, როცა ყველა ჩვენს ევროპელ და ამერიკელ პარტნიორებს მიაჩნიათ, რომ ეს ჩვენს ევროპულ გზაზე დაბრკოლება იქნება. ასე რომ, ვფიქრობ, ყველაფერი ძალიან, ძალიან ნათელია.

ამის შესახებ მინდოდა მეკითხა, საქართველოს ევროკავშირში გაწევრიანების მცდელობების შესახებ. თუ ეს კანონპროექტი კანონი გახდება, იქნება თუ არა ეს თქვენი ევროკავშირში გაწევრიანების მცდელობებისთვის საბედისწერო?

არა. რა თქმა უნდა დაბრკოლებაა და ევროპელი ლიდერები სწორედ ამას ამბობენ, მაგრამ ჩვენ 26 ოქტომბრის არჩევნები გვაქვს, სადაც ქართველი ხალხი საკუთარ სათქმელს იტყვის და ეს გადაწყვეტს ჩვენს ბედს. ასე რომ, ამაში საბედისწერო არაფერია. დარწმუნებული ვარ, რომ ამ და სხვა კანონების გამოყენება, რომლებსაც უმრავლესობა წარადგენს იმისკენაა მიმართული, რომ მეტი დაბრკოლება შექმნას და ამიტომ ვუწოდებ ამას რუსულ სტრატეგიას. მაგრამ არ არსებობს დაბრკოლება, რომელსაც ქართველი ხალხი არჩევნებით ვერ გადალახავს.

ამაზე სასაუბროდ საკმაოდ მკაცრ შეფასებებს იყენებთ და როგორც ჩანს, ეს თქვენთვისაც საკმაოდ პირადულია, რადგან გასულ სექტემბერს მმართველმა პარტიამ, „ქართულმა ოცნებამ“, თქვენი იმპიჩმენტის მცდელობისთვის ეს უპრეცედენტო პროცესი დაიწყო, რადგან ისინი ამტკიცებდნენ, რომ თქვენ ევროპელ ლიდერებთან ლობირებდით და ცდილობდით საქართველო ევროკავშირის სტატუსის გზაზე წინ წაწეულიყო. იმპიჩმენტის მცდელობა წარუმატებელი აღმოჩნდა, მაგრამ ეს პირადად თქვენთვის საკმაოდ მნიშვნელოვანი მომენტი უნდა ყოფილიყო. მაინტერესებს, იმის გათვალისწინებით, თუ როგორ საუბრობთ კანონზე, გჯერათ თუ არა ახლა, არის თუ არა თქვენი პოზიცია, როგორც საქართველოს პრეზიდენტი, უსაფრთხოდ? გეშინიათ რომ იმპიჩმენტი განმეორდება?

არაფრის მეშინია. ეს პირადულია, რამდენადაც მე მიმაჩნია, რომ საქართველოს ევროპული მომავალი და პერსპექტივა ერთადერთი მომავალია ქვეყნისთვის, რომელიც დამოუკიდებლობისთვის უსასრულოდ იბრძოდა. ამას საქართველოს მოსახლეობის აბსოლუტური უმრავლესობა იზიარებს. ასე რომ, ეს თან არის პირადული და თან არა. ჩვენ ჩვენი დამოუკიდებლობისა და ევროპული პერსპექტივის დასაცავად ბრძოლას ვაპირებთ.

ბოლო კითხვა. დღეს და ხვალ ევროპული საბჭო იკრიბება. ვიცი, რომ დღის წესრიგში ახლო აღმოსავლეთი და უკრაინაა. ასევე ვიცი, რომ ევროპელ ლიდერებს სთხოვეთ საქართველოც იყოს დღის წესრიგში. ოფიციალურად, ეს ასე არაა. გაწუხებთ, რომ ევროპელი ლიდერები საკმარისად სერიოზულად არ აღიქვამენ თქვენს საკითხებს?

არა, ზოგიერთ ლიდერთან მქონდა კომუნიკაცია. ვფიქრობ, ყველამ კარგად იცის, რომ აქ [ახლო აღმოსავლეთი და უკრაინა] სიტუაცია დაძაბულია და ყურადღების ღირსია და ნათელია, რომ ჩვენ არ ვართ უმაღლესი პრიორიტეტი. ეს ძალიან კარგი ნიშანია. არ ვისურვებდი, რომ საქართველო იყოს პირველ პრიორიტეტი. ეს სხვა რამის მანიშნებელი იქნებოდა. მაგრამ დარწმუნებული ვარ, რომ ჩვენ საჭირო ყურადღებას მივიღებთ, რათა არჩევნებამდე მივიდეთ და ჩვენი ევროპული მომავალი გავამყაროთ.

ინტერვიუ TV5 Monde-თან

ჩვენთან არის საქართველოს პრეზიდენტი, სალომე ზურაბიშვილი. მოგესალმებით კიდევ ერთხელ, გმადლობთ რომ ხართ TV 5 Monde-ზე. რას ფიქრობთ დღეს საღამოს, შეშფოთებული ხართ დღევანდელი კენჭისყრით?

მე შეშფოთებული ვარ ამ კანონის შემობრუნებით, რომელიც უკუაგდო სრულიად საქართველოს მოსახლეობამ, რამაც მოგვცა საშუალება, რომ მიგვეღო გასული წლის ბოლოს ევროკავშირის კანდიდატობის სტატუსი. ჩვენ ამ გზაზე ვდგავართ. გვაქვს პერსპექტივა რომ ამ წლის ბოლოს დავიწყოთ ევროკავშირში გაწევრიანების მოლაპარაკებები და სწორედ ამას ებრძვის დღეს ეს კანონი, და არა მხოლოდ ეს, არამედ კანონების მთელი სერია, რომელიც ეწინააღმდეგება ევროპისაკენ მიმავალ გზას. ეს გადაწყვეტილება შეესაბამება მოსკოვის ინტერესებს.

როგორ შეაფასებდით ამ კანონს, ქალბატონო პრეზიდენტო? ეს ანტიდასავლური, პრორუსული კანონია? რას უწოდებდით თქვენ მას?

რუსულ კანონს, ეს არა პრორუსული არამედ რუსული კანონია. პრეზიდენტ პუტინის მიერ მიღებული კანონების ასლია, რომლებსაც მიზნად ჰქონდათ საბოლოოდ შეებოჭათ არასამთავრობო ორგანიზაციები, ხელი შეეშალათ მათი საქმიანობისთვის, და ასევე მედიისათვის. აქ ჩვენ ამის ასლი გვაქვს. ჩვენ ვემზადებით 26 ოქტომბრის საპარლამენტო არჩევნებისთვის, რაც გადამწყვეტი იქნება ჩვენი ევროპული მომავლისთვის. არასამთავრობო ორგანიზაციებს მოქმედების არეალის შემცირების წინასწარი მცდელობა, ისევე როგორც საერთაშორისო დამკვირვებლების ნიშნავს ასევე ჩვენი დასავლელი პარტნიორების მოქმედების შეზღუდვას. ეს კანონი ეწინააღმდეგება ყველას, ვინც წლების განმავლობაში იბრძოდა საქართველოს დამოუკიდებლობისთვის, ინსტიტუციების გაძლიერებისთვის, დემოკრატიზაციისათვის და არის მიმართული ჩვენი ევროპელი და ამერიკელი პარტნიორების წინააღმდეგ.

ქალბატონო პრეზიდენტო, თქვენ დემოკრატიზაცია ახსენეთ. ჩვენ ვნახეთ ჩხუბის სცენები პარლამენტში და ეს არავის არ ამშვენებს, მათაც კი, ვინც ამ კანონის წინააღმდეგია, ზოგიერთმა მათგანმა ძალა გამოიყენა, როგორ მივიდა საქართველო აქამდე? ბრიუსელში ეს არ უნდა მოსწონდეთ...

არა, ეს არის გარემოება, სადაც ბევრი მხრიდან არის პროვოკაცია. ყველანაირი საშუალება არის გამოყენებული საქართველოს იმიჯის, მისი მომავლის დასაზიანებლად. თქვენ რომ აჩვენოთ კადრები, თუ რა ხდება ახლა პარლამენტის წინ, ნახავთ ხალხის უდიდეს მასას, ძირითადად ახალგაზრდებს, რომლებიც მშვიდობიანად, ღირსეულად აპროტესტებენ იმას, რაც არ სურს საქართველოს მოსახლეობას. დამოუკიდებლობიდან მოყოლებული, საქართველოს მოსახლეობის 80% აცხადებს, რომ სურს ევროპული გზა. ისინი მზად არიან დაიცვან ეს ევროპული გზა. ყველანი უნდა გავერთიანდეთ. ეს არის ჩემი გზავნილი ევროპელი პარტნიორებისთვის, საქართველოს დღეს თქვენი ყურადღება სჭირდება...

ხომ არ გაქვთ შეგრძნება რომ მიგატოვეს, რუსული ჯარები იკავებენ საქართველოს ტერიტორიის 20% 2008 წლიდან მოყოლებული, რამაც გამოიწვია აფხაზეთის და სამხრეთ ოსეთის რეგიონების დაკარგვა. თქვენ (კანდიდატობის სტატუსის მოპოვების) მოთხოვნა გააკეთეთ 2022 წლის 3 მარტს, იმავე დღეს, რაც მოლდოვამ და სამი დღის შემდეგ, რაც ეს მოთხოვნა გააკეთა უკრაინამ. უკვე ორ წელზე მეტი გავიდა. რას სთხოვთ დღეს ევროკავშირს? დაჩქარებას?

არა. ჩვენ გასული წლის 15 დეკემბერს მივიღეთ კანდიდატის სტატუსი, რაც მთელი საქართველოს მოსახლეობის მიერ აღინიშნა როგორც დიდი გამარჯვება, ჩვენ გვაქვს პერსპექტივა რომ გაიხსნას ევროკავშირში გაწევრიანების მოლაპარაკებები წლის ბოლოს. მოსახლეობა ითხოვს რომ არავინ, განსაკუთრებით მთავრობამ, რომელიც სხვა ინტერესებს ემსახურება, არ შეძლოს ამ მოლაპარაკებების გახსნისთვის ხელის შეშლა, რადგან ისინი იღებენ კანონებს, რომლებიც პირდაპირ ეწინააღმდეგება ევროკავშირის მოთხოვნებს. მე უკვე 5 ვეტოს უფლება გამოვიყენე და მალე მეექვსედ გამოვიყენებ ვეტოს, რადგან მე ვთქვი, რომ ამას გავაკეთებ ყოველ ჯერზე როდესაც კანონის შინაარსი ან ტექსტი შეეწინააღმდეგება იმ რეკომენდაციებს, რომლებიც მოგვცეს ევროპელმა პარტნიორებმა გაწევრიანების მოლაპარაკებების დასაწყებად. ეს არის მიზანი, მიზანი არ არის დაჩქარება, არამედ ხელის შეშლის თავიდან აცილება. ხელის შეშლა მხოლოდ მოსკოვის ინტერესშია. ადგილი აქვს ჰიბრიდულ ომს საქართველოს წინააღმდეგ საპირისპიროდ იმ სამხედრო ომისა, რომელიც უკრაინაში მიმდინარეობს.