მოკლედ: სამართალდამცველებმა დააკავეს ორი პირი, რომლებმაც, ფინანსური სარგებლის მიღების მიზნით, კომპიუტერულ სისტემაში უნებართვოდ შეაღწიეს.

  • შსს-ს ინფორმაციით, ორივე ნასამართლევია და ამჟამად პირობითი მსჯავრის ქვეშ იმყოფებიან.

დეტალები: უწყება წერს, რომ ამ ორმა პირმა, წინასწარი შეთანხმებით, ჯგუფურად შეიმუშავეს სხვის კომპიუტერულ სისტემაში უნებართვოდ შეღწევის გეგმა.

კერძოდ, ერთი მათგანი დასაქმებული იყო სუპერმარკეტ ნიკორაში, მოლარე კონსულტანტად.

  • ის იმახსოვრებდა მომხმარებლების პირად და დაგროვების ბარათის ნომრებს და აწვდიდა მეორე პირს, რომელმაც, მობილურში ჩაწერა ნიკორას აპლიკაცია, სადაც, სხვის კომპიუტერულ სისტემაში უნებართვოდ შეღწევის მიზნით, არეგისტრირებდა ამ პირად და დაგროვების ბარათის ნომრებს.
  • შემდეგ კი მიდიოდა ნიკორას მაღაზიებში და მოლარეების შეცდომაში შეყვანის გზით, ხარჯავდა მომხმარებლების ბარათებზე დაგროვილ ქულებს.
  • ქულების გახარჯვის შედეგად მიღებულ სარგებელს კი ინაწილებდა თანამზრახველთან.

ამ დანაშაულებრივი ქმედების შედეგად, "ნიკორა ტრეიდს" მიადგა მნიშვნელოვანი მატერიალური ზიანი.

ბრალის დამტკიცების შემთხვევაში, ორივე პირს 11 წლამდე პატიმრობა ემუქრებათ.