28 მარტს კათოლიკურმა სამყარომ დიდი ხუთშაბათი აღნიშნა. ეკლესიის მეთაურმა, პაპმა ფრანცისკემ, ტრადიციულად ფეხთბანვის რიტუალი შეასრულა. თუმცა, ისტორიაში პირველად, რიტუალი მხოლოდ ქალების მონაწილეობით ჩატარდა.

87 წლის პაპი, რომელსაც ბოლო პერიოდში ჯანმრთელობის, მათ შორის, გადაადგილების პრობლემები შეექმნა, რომის ქალთა საპატიმროს ეტლით ეწვია და 12 მსჯავრდადებულ ქალს ფეხი დაბანა.

ქრისტიანული სწავლებით, ფეხთბანვის რიტუალი დიდ ხუთშაბათს სრულდება და ის აცოცხლებს იესო ქრისტეს მიერ თავისი მოციქულებისთვის ფეხის დაბანვის სცენას.

მას შემდეგ, რაც პაპი ფრანცისკე კათოლიკე ეკლესიის მეთაური გახდა, ამ რიტუალს იგი ვატიკანს გარეთ ატარებდა და ფეხს ბანდა პატიმრებს, ლტოლვილებს და განსხვავებული მრწამსის მქონე ადამიანებსაც. თუმცა, ეკლესიის ისტორიის მკვლევრების თქმით, ეს პირველი შემთხვევაა, როცა პაპმა რიტუალი მხოლოდ ქალების მონაწილეობით შეასრულა.

აღსანიშნავია, რომ ფრანცისკეს წინამორბედი, პაპი ბენედიქტე XVI, ფეხს ბანდა მხოლოდ კაცებს, მოგვიანებით კი — მხოლოდ სასულიერო პირებს.

ფოტო: Getty Images

პაპი ფრანცისკე კი სხვა საკითხებზეც თავისი წინამორბედებისგან განსხვავებული დამოკიდებულებებით გამოირჩევა. მაგალითად, ლგბტქ ადამიანების უფლებებზე — 2020 წელს მან განაცხადა, რომ "ლგბტქ ბავშვები ღმერთს ისეთები უყვარს, როგორებიც არიან". ეკლესიის ლიდერმა მშობლებსაც მოუწოდა, გეი შვილებს გვერდში დაუდგნენ. მან ასევე მხარი დაუჭირა ერთი და იმავე სქესის წყვილების სამოქალაქო პარტნიორობას.

გარდა ამისა, გასული წლის შემოდგომაზე ვატიკანმა ტრანსგენდერ ადამიანებს დართო ნება, მოინათლონ, ან თავად გახდნენ ნათლიები. რამდენიმე თვის წინ კი, პაპის გადაწყვეტილებით, მღვდელმსახურებს ერთი და იმავე სქესის წყვილების დალოცვის უფლება მიეცათ.

რომის პაპმა შეცვალა ეკლესიის დამოკიდებულება ქალების მიმართაც — 2021 წელს მან ეპისკოპოსთა სინოდში მდივნის მოადგილედ ქალი პირველად დანიშნა. პაპ ფრანცისკეს არაერთხელ უსაუბრია ოჯახში ქალთა მიმართ ძალადობის პრობლემაზეც.