რა ხდება: მოსკოვის ბასმანის სასამართლომ, საქართველოს მოქალაქეს, ალექსანდრე ინასარიძეს ყირიმის ხიდზე ტერაქტის ჩადენის ბრალდებით, პატიმრობა დაუსწრებლად შეუფარდა.

  • ამის შესახებ რუსული სამთავრობო, პროპაგანდისტული მედიასაშუალება TASS წერს.

"სასამართლომ დააკმაყოფილა გამოძიების მოთხოვნა, ინასარიძისთვის აღკვეთის ღონისძიების სახით პატიმრობის დაუსწრებლად შეფარდების თაობაზე“, — უთხრეს გამოცემას სასამართლოში.

  • მანამდე, ამავე საქმეზე, სასამართლომ დაუსწრებლად შეუფარდა პატიმრობა უკრაინის უსაფრთხოების სამსახურის უფროსს, ვასილი მალიუკს.
  • აღკვეთის ღონისძიება, პატიმრობის სახით, ორთვიანი ვადით ამოქმედდება ბრალდებულის რუსეთის ფედერაციის ტერიტორიაზე ექსტრადიციის მომენტიდან, ან — რუსეთის ფედერაციის ტერიტორიაზე დაკავების მომენტიდან.

კონტექსტი: ყირიმის ხიდზე აფეთქება 2022 წლის 8 ოქტომბერს მოხდა. აფეთქებას მსხვერპლი მოჰყვა.

  • რუსეთის ოფიციალურმა პირებმა მაშინ თქვეს, რომ აფეთქდა საწვავის სატვირთო მანქანა. თუმცა დაზიანება მასშტაბური იყო — ყირიმის მიმართულებით გზის გადასასვლელის ორი მონაკვეთი ჩამოინგრა.
  • ცეცხლი გაუჩნდა სატვირთო მატარებელსაც.
  • რუსეთის უშიშროების ვერსიით, ასაფეთქებელი მოწყობილობა სამშენებლო მასალებში იყო შენიღბული. მათი მტკიცებით, აგვისტოს დასაწყისში ტვირთი თავდაპირველად ოდესის პორტიდან ბულგარეთში, შემდეგ საქართველოში, ფოთის პორტში და ბოლოს სომხეთში გაგზავნეს.
  • შემდეგ სომხეთიდან ტვირთი ისევ საქართველოში, ბოლოს კი რუსეთში გაიგზავნა.
  • მათი თქმით, გადაცემაში უკრაინისა და სომხეთის მოქალაქეებთან ერთად, საქართველოს ორი მოქალაქეც — სანდრო ინასარიძე და ბროკერი, სახელად — ლევანი მონაწილეობდა.

მომხდარის შემდეგ, შინაგან საქმეთა მინისტრის მოადგილემ, ალექსანდრე დარახველიძემ თქვა, რომ საქართველოს, ყირიმის ხიდზე მომხდარ აფეთქებასთან, არანაირი კავშირი არ აქვს.

  • "საქართველოს აღნიშნულ საკითხთან არანაირი შემხებლობა არ აქვს. როგორც ტრანზიტული, ასევე არატრანზიტული ტვირთები საქართველოში გადის საბაჟო კონტროლს და მსგავსი საეჭვო ფაქტი არ დაფიქსირებულა", — განაცხადა მან.

ბოლო ხაზი: რუსეთიდან ყირიმამდე თითქმის 19 კილომეტრიანი ხიდი კრემლის ოკუპაციის ერთგვარი სიმბოლოა. ის 2018 წელს, ნახევარკუნძულის ანექსიის გამოცხადებიდან 4 წელში გახსნეს.

  • ქერჩის ხიდი ერთ-ერთი საკვანძო გზაა, რითაც ოკუპანტებს სამხედრო ტექნიკა და ტვირთი გადააქვთ.