მოკლედ: რომის პაპმა ფრანცისკემ ინტერვიუში თქვა, რომ უკრაინამ უნდა გამოიჩინოს თეთრი დროშის გამბედაობა და რუსეთთან ომის დასრულების შესახებ მოლაპარაკება დაიწყოს.

  • ფრანცისკემ ამის შესახებ ისაუბრა შვეიცარიულ მაუწყებელ RSI-თან, ინტერვიუ გასულ თვეს ჩაიწერა.

დეტალები: ინტერვიუს დროს პაპს კითხვა დაუსვეს მის პოზიციასთან დაკავშირებით, რას ფიქრობდა მიმდინარე დებატებთან დაკავშირებით, რომ უკრაინა უნდა დანებდეს, რადგან ვერ შეძლო რუსული ძალების მოგერიება; დებატების მეორე მხარე კი ამტკიცებს, რომ უკრაინის ასეთი ქმედება რუსეთის აგრესიის ლეგიტიმაცია იქნება. კითხვის დასმის დროს ჟურნალისტმა გამოიყენა ტერმინი თეთრი დროშა.

  • ”ეს არის ერთი ინტერპრეტაცია, ეს მართალია”, — თქვა ფრანცისკემ. "მაგრამ ვფიქრობ, რომ უფრო ძლიერი არის ის, ვინც აკვირდება სიტუაციას, ფიქრობს ადამიანებზე, აქვს თეთრი დროშის გამბედაობა და აწარმოებს მოლაპარაკებებს".

პაპმა აღნიშნა, რომ მოლაპარაკებები საერთაშორისო ძალების ჩართულობით უნდა გაიმართოს.

  • "სიტყვა მოლაპარაკება გაბედული სიტყვაა. როცა ხედავ, რომ დამარცხებული ხარ და საქმეები კარგად არ მიდის, უნდა გქონდეს გამბედაობა მოლაპარაკებისთვის", — თქვა მან.

როგორც როიტერსი წერს, ეს არის პირველი შემთხვევა, როდესაც ფრანცისკემ გამოიყენა ტერმინები თეთრი დროშა, ან დამარცხებული, უკრაინის ომის განხილვისას, თუმცა მან ადრეც ისაუბრა მოლაპარაკებების აუცილებლობაზე.

  • ვატიკანის სპიკერმა მატეო ბრუნიმ განცხადებაში აღნიშნა, რომ პაპმა გამოიყენა ინტერვიუერის მიერ წარმოთქმული ტერმინი თეთრი დროშა და გამოიყენა ის "საომარი მოქმედებების შეწყვეტის (და) ზავის აღსანიშნავად, რომელიც მიღწეულია მოლაპარაკებების გამბედაობით".
  • უკრაინას პაპის განცხადებაზე კომენტარი, ჯერჯერობით, არ გაუკეთებია.

ბოლო ხაზი: როიტერსისთვის ინტერვიუს მხოლოდ ნაწილი გახდა ხელმისაწვდომი.

ინტერვიუს სრული ვერსია 20 მარტს გავა ეთერში.