რა ხდება: ამერიკული სამხედრო გემი შუა აღმოსავლეთისკენ მიცურავს, მიაქვთ საჭირო მასალა და აღჭურვილობა, რომ ღაზას სანაპიროზე დროებითი პორტი ააშენონ.

დეტალები: გემი General Frank S Besson შაბათს ვირჯინიის შტატის სამხედრო ბაზიდან გავიდა, მას შემდეგ, რაც პრეზიდენტმა ჯო ბაიდენმა თქვა, რომ აშშ ააშენებდა მოტივტივე ნავსადგურს, რომლის საშუალებითაც ღაზაში დახმარებას შეიტანდნენ.

  • საკვების შეტანა ღაზაში, საჰაერო თუ სახმელეთო საშუალებებით, უსაფრთხო არ არის, რადგან ცეცხლს უხსნიან სატვირთო მანქანებს, პარასკევს კი გავრცელდა ინფორმაცია, რომ თვითმფრინავიდან გადასროლილი დახმარების პაკეტების პარაშუტი არ გაიხსნა და 5 ადამიანი დაიღუპა.
  • პენტაგონის თქმით, 60 დღე იქნება საჭირო ნავსადგურის ასაშენებლად და მონაწილეობას მიიღებს 1000 ჯარისკაცი. არცერთი მათგანი სანაპიროზე არ გადავა.
  • საქველმოქმედო ორგანიზაციები ამბობენ, რომ ღაზის მოსახლეობა საკვებს ამდენი ხნის განმავლობაში ვერ დაელოდება.
  • მანამდე, იმედოვნებენ, რომ ღაზასთან ყველაზე ახლომდებარე ევროკავშირის წევრი ქვეყნიდან — კვიპროსიდან შეძლებს გასვლას გემი Open Arms, რომელიც საკვებს და დახმარებას ჩაიტანს ანკლავში. გემი ესპანურ საქველმოქმედო ორგანიზაციას ეკუთვნის, ამავე სახელით — Open Arms, საკვებით კი ხომალდი ამერიკულმა საქველმოქმედო ორგანიზაციამ World Central Kitchen დატვირთა.

მსგავსი: მძევლებთან დაკავშირებული კრიზისი ისრაელისთვის დილემაა, ჰამასს კი — გამარჯვების შანსს აძლევს

უცნობია, როგორ შეძლებენ გემები ღაზამდე უსაფრთხოდ მისვლას, ვიდრე აშშ-ის პორტი მზად არ იქნება. ღაზის არცერთი ნავსადგური არ ფუნქციონირებს და სანაპირო წყლები, დიდი ზომის გემებისთვის, საკმარისად ღრმა არ არის.

  • თუმცა, ოსკარ კემპსმა, Open Arms-ის დამფუძნებელმა, Associated Press-ს განუცხადა, რომ დანიშნულების ადგილზე World Central Kitchen-ის გუნდი აშენებს მცირე ზომის ნავსადგურს, დახმარების მისაღებად.

ისრაელი ინიციატივას მიესალმა და განაცხადა, რომ დახმარებას შეიტანენ მას შემდეგ, რაც კვიპროსში უსაფრთხოების შემოწმებები ჩატარდება "ისრაელის სტანდარტების შესაბამისად".

გაერო აცხადებს, რომ შიმშილი ღაზაში "თითქმის გარდაუვალია" და საკვების გარეშე დარჩენილი ბავშვები იხოცებიან.

ამ თემაზე: ღაზაში ბავშვები შიმშილით იხოცებიან — ჯანმოს ხელმძღვანელი

ბოლო ხაზი: ისრაელის არმიამ საჰაერო და სახმელეთო ოპერაცია ღაზას სექტორში 7 ოქტომბერს ისრაელზე ჰამასის თავდასხმების შემდეგ დაიწყო, რომლის დროსაც, დაახლოებით, 1200 ადამიანი დაიღუპა, 253 — მძევლად აიყვანეს.

  • ღაზაში დაღუპული პალესტინელების რაოდენობა 31 ათასს აღწევს.

ასევე, ნახეთ: ისრაელი, მის მიერ ოკუპირებულ დასავლეთ სანაპიროზე, 3400-ზე მეტ სახლს ააშენებს — ვარაუდობენ, რომ ეს სიტუაციას გაამწვავებს