მოკლედ: ღაზის ჩრდილოეთში ბავშვები შიმშილით იხოცებიან, არის საკვების, საწვავის და სამედიცინო მარაგების მწვავე კრიზისი, საავადმყოფოები დანგრეულია — ამის შესახებ X-ზე ჯანდაცვის მსოფლიო ორგანიზაციის ხელმძღვანელი წერს.

დეტალები: ტედროს ადჰანომ გებრეიესუსის თქმით, ორგანიზაციას 2023 წლის ოქტომბრის შემდეგ აღარ ჰქონია იქ ჩასვლის საშუალება.

  • ჯანმო-ს წარმომადგენლებმა ომის ზონაში ჩასვლა გასულ უქმეებზე შეძლეს.
  • გებრეიესუსის თქმით, განსაკუთრებით შემზარავი მდგომარეობაა ალ-ავდას საავადმყოფოში, რადგან ერთ-ერთი შენობა დანგრეულია.
  • კამალ ადვანის საავადმყოფო კი ერთადერთი პედიატრიული საავადმყოფოა ღაზის ჩრდილოეთით და გადატვირთულია პაციენტებით.
  • "საკვების ნაკლებობის შედეგად, 10 ბავშვი დაიღუპა. ელექტროენერგიის შეზღუდვა სერიოზულ საფრთხეს უქმნის პაციენტებს, განსაკუთრებით, ინტენსიური თერაპიის განყოფილებასა და ახალშობილთა განყოფილებაში", — წერს ჯანმოს ხელმძღვანელი.
  • ის, ასევე, მიმართავს ისრაელს, უზრუნველყოს ჰუმანიტარული დახმარების უსაფრთხო და რეგულარული მიწოდება.
  • "სამოქალაქო პირებს, განსაკუთრებით ბავშვებს და ჯანდაცვის პერსონალს სასწრაფოდ სჭირდებათ დახმარება, მაგრამ მთავარი წამალი, რაც ამ პაციენტებს სჭირდებათ, არის მშვიდობა, ცეცხლის შეწყვეტა", — წერს გებრეიესუსი.

ბოლო ხაზი: ღაზაში შიმშილის გარდაუვალობის შესახებ გასულ კვირას გაერომაც ისაუბრა.

  • ორგანიზაციის მაღალჩინოსანმა თქვა, რომ ღაზის სექტორის მასშტაბით, სულ მცირე, 576 ათას ადამიანს საკვების კატასტროფული პრობლემა უდგას, ჩრდილოეთში კი 6-დან 1 ბავშვი საჭმელს ვერ იღებს.