მოკლედ: თბილისში, ალექსანდრე ყაზბეგის #34-ის მაცხოვრებლები მათი საცხოვრებელი კორპუსის წინ მიმდინარე მშენებლობას აპროტესტებენ, რადგან, მათი თქმით, მშენებლობის დაწყებას მათ კორპუსში მოჰყვა რყევები, კორპუსის მიმდებარედ პარკინგზე კი ასფალტზე ბზარები გაჩნდა.

• "ერთადერთი მოთხოვნა გვაქვს, შეიქმნას დამოუკიდებელი კომისია, რომელიც შეაფასებს, არის თუ არა მშენებლობა უსაფრთხო, რომელიც ჩვენს საცხოვრებელ კორპუსთან 7 მეტრით არის დაშორებული. ხომ არ შეუქმნის პრობლემას ჩვენი კორპუსის საძირკველს", — თქვა On.ge-სთან თამთა თვალავაძემ, ერთ-ერთმა მაცხოვრებელმა.

დეტალები: როგორც თვალავაძე ამბობს, თავდაპირველად, ინფორმაცია ახალი კორპუსის აშენების თაობაზე 2020 წელს, ფასადზე გამოკრული აბრიდან შეიტყო, მშენებლობა კი 2023 წლის შემოდგომაზე დაიწყო.

• "მე-14 სართულზე ვცხოვრობ, მშენებლობის დაწყებიდან პერიოდულად კორპუსში რყევებს და ბიძგებს ვგრძნობდი. თავიდან მიწისძვრაც მეგონა, ჭაღი, საყოფაცხოვრებო ნივთები, ყველაფერი ირყეოდა", — ამბობს ის და აღნიშნავს, რომ კითხვებით მშენებელს კომპანიასაც მიმართა, თუმცა "საპასუხოდ ისინი იყვნენ აგრესიულები, უხეშები და კომუნიკაცია ვერ შედგა".
• მისივე თქმით, პრობლემა მეზობლებსაც გაუზიარა და აღმოჩნდა, რომ ყველას ერთი და იგივე რამ აწუხებდა, განსაკუთრებით, მე-13 მე-14 სართულზე მაცხოვრებლებს.

კორპუსის მაცხოვრებლების თქმით, მშენებლობამდე ტერიტორიაზევე იყო საბავშვო ბაღი, რომელიც არ ფუნქციონირებდა და რამდენიმე ლტოლვილი იყო შესახლებული. თავდაპირველად, მშენებარე კომპანიის მხრიდან, რყევების და ბიძგების მიზეზად სწორედ საბავშვო ბაღის საძირკვლის ამოღება დასახელდა, რომელიც "მხოლოდ 3-4 დღე უნდა გაგრძელებულიყო".

• "მე ვთხოვდი, რომ უბრალოდ გაეკეთებინათ საინფორმაციო ბანერი, რომ ამდენი და ამდენი დღე, ამა და ამ საათში მოსალოდნელია ბიძგები. თუ ამ კორპუს ოდესმე რამე დაემართება და ავარიული სტატუსი მიენიჭა, მერე ჩვენ რა ვქნათ?", — გვეუბნება თამთა თვალავაძე.
• გარდა ამისა, მაცხოვრებლების თქმით, მშენებლობა მასშტაბურია, მიმდებარე ტერიტორიაზე პარკინგის პრობლემა არის, სივიწროვეა, მშენებლობაზე ტექნიკის შესვლის და გამოსვლის დროს კი — მოძრაობა ფერხდება.

ვინ აშენებს კორპუსს: სამშენებლო აბრაზე მითითებული მონაცემების მიხედვით, კომპანია, რომელიც მრავალსართულიან კორპუსს აშენებს, არის შპს სქაი30 რეზიდენსი. On.ge ეცადა, მათაც დაჰკავშირებოდა, თუმცა საინფორმაციო აბრაზე მითითებული ორივე ტელეფონის ნომერი გათიშულია.

On.ge-მ გაარკვია, რომ ქალაქ თბილისის მუნიციპალიტეტის არქიტექტურის სამსახურმა აღნიშნულ ტერიტორიაზე მშენებლობის ნებართვა 2022 წელს ალექსანდრე ივანიშვილის სახელზე გასცა, ამ სახეზევე გაიცა ბაღის დემონტაჟის ნებართვა.

რას ამბობს თბილისის მერია: მედიაც საუბრობს, რომ ამ მრავალსართულიან კორპუსს ბიძინა ივანიშვილის ძმა ალექსანდრე (ადიკო) ივანიშვილის აშენებს. ეს თბილისის მერმა კახა კალაძემ მედიასთან უარყო და განაცხადა, რომ ტერიტორია ჯერ კიდევ 2011 წელს, გიგი უგულავას მერობის დროს გასხვისდა.

• მერმა მიზანმიმართული სპეკულაცია უწოდა მშენებლობასთან ალექსანდრე ივანიშვილის კავშირზე გავრცელებულ ინფორმაციას და ისიც განაცხადა, რომ მერიის მუნიციპალურმა ინსპექციამ ადგილზე მოკვლევით დაადგინა, რომ მშენებლობის ნებართვა კანონის სრული დაცვით არის გაცემული: "არანაირი ადიკო ივანიშვილის ინტერესს ეს პროექტი არ წარმოადგენს და არც მისი საკუთრებაა", — თქვა მან.