სერბეთის შინაგან საქმეთა სამინისტროს ოფიციალური შეფასებ, შაბათს, 15 მარტს ბელგრადში გამართულ საპროტესტო აქციებში სულ მცირე 107 000 ადამიანი მონაწილეობდა. როგორც DW წერს, ადგილობრივი ორგანიზაცია "სახალხო კრებების არქივი", რომელიც ქუჩის პროტესტს აკვირდება, წერს, რომ აქციის მონაწილეთა რაოდენობას 275-325 ათასი ადამიანი იყო.

BBC-ის ცნობით, სერბეთის ისტორიაში ყველაზე მასშტაბურ ანტისამთავრობო აქციაზე 325 000-მდე ადამიანი მონაწილეობდა.

აქციის მონაწილეების მთავარი მოთხოვნა ქვეყნის პრეზიდენტის, ალექსანდრ ვუჩიჩის გადადგომაა. სერბეთში საპროტესტო ტალღის ბირთვად სტუდენტები ითვლებიან, მაგრამ მათ შეუერთდნენ ექიმები, მასწავლებლები, ბაიკერები, ვეტერანები და მიმდინარე აქციის ნაწილი გახდა ბელგრადში ტრაქტორებით ჩასული ფერმერების მარში.

დემონსტრანტები გასული წლის ნოემბერში ნოვი-სადში მომხდარ ტრაგედიასთან დაკავშირებით დოკუმენტაციის გამოქვეყნებას მოითხოვენ და ამ საკითხზე მთავრობის ანგარიშვალდებულებას აყენებ. შეგახსენებთ, რომ 2024 წლის 1-ელ ნოემბერს ნოვი-სადში რკინიგზის სადგურში ბეტონის საფარი ჩამოინგრა, რის შედეგადაც 15 ადამიანი დაიღუპა.

14 მარტს ვუჩიჩმა კიდევ ერთხელ განაცხადა, რომ საპროტესტო აქციები საზღვარგარეთიდან იმართება და დაგეგმილ აქციებს უკანონო უწოდა.

ამასთან, მან განაცხადა, რომ თანამდებობიდან გადადგომას არ აპირებს.

"სანამ ცოცხალი ვარ, არ იარსებებს გარდამავალი ან თაღლითური მთავრობები. მე არ ვეთანხმები შანტაჟს და ზეწოლას, მე ვარ სერბეთის პრეზიდენტი და არ მივცემ უფლებას, რომ ქუჩამ განსაზღვროს წესები ამ ქვეყანაში", — განაცხადა სერბეთის პროეზიდენტმა.

ვუჩიჩის თქმით, აქციაზე შეტაკების შედეგად 56 ადამიანი საავადმყოფოში გადაიყვანეს, 22 კი დააკავეს. თუმცა, ის არ ეთანხმება შსს-ს მიერ მოწოდებულ მონაცემებს აქციის მონაწილეთა რაოდენობის შესახებ და აცხადებს, რომ სხვა უწყებებში მონაწილეთა ნაკლები რაოდენობა დათვალეს.