ჩინური ფენტეზი ფილმი ნეჯა 2, რომელიც იანვრის ბოლოს გამოვიდა, სულ ახლახან ყველა დროის ყველაზე მაღალშემოსავლიანი ანიმაცია გახდა. $80-მილიონიანი ბიუჯეტით შექმნილმა ანიმაციურმა ფილმმა ჯამში $2 მილიარდზე მეტი გამოიმუშავა და ამ ტიტულის მფლობელი Inside Out 2 უკან ჩამოიტოვა.

დასავლეთის აუდიტორიისთვის მეტ-ნაკლებად უცნობი ნეჯა 2 მე-16 საუკუნის ჩინურ რომანს, ღმერთების ნაბოძვარს, ეფუძნება და ეკრანზე ჩინურ მითოლოგიას აცოცხლებს. ამბის მთავარი გმირი ადამიანების მიერ გაზრდილი ბავშვი დემონი ნეჯაა, რომელიც მეხის დაცემის შედეგად დაშავებული მეგობრის, დრაკონი პრინცის, გადასარჩენად ელექსირის მოპოვებას ცდილობს. ბრძოლის ეპიკურმა სცენებმა და ანიმატორების ნამუშევარმა ჩინური აუდიტორია ისე დააინტერესა, რომ ანიმაცია ქვეყნის კინოისტორიაში კომერციულად ყველაზე წარმატებული პროექტი გახდა.

ნეჯა შინაარსით განსხვავდება იმ პატრიოტული ფილმებისგან, რომელთა სიჭარბეც ჩინურ კინოინდუსტრიაში ბოლო წლებში შეიმჩნევა. მაგალითისთვის, ნეჯას შემდეგ კომერციულად ყველაზე წარმატებული ფილმი, ბრძოლა ჩანჯინის ტბასთან, კორეის ომში ჩინელი ჯარისკაცების ამერიკელებთან დაპირისპირებაზე ჰყვება, თავად ნამუშევარი კი მმართველი კომუნისტური პარტიის დაფინანსებულია. ჩინელ ჯარისკაცებზეა გადაღებული ქვეყანაში მესამე ყველაზე მაღალშემოსავლიანი ფილმიც, მგელი მეომარი 2.

ფოტო: CMC Pictures / Courtesy Everett Collection

ჩინელი კინოკრიტიკოსი იუ იაკინი ამბობს, რომ ნეჯას სიუჟეტში ნაჩვენები უსამართლობასთან ბრძოლა და გავლენიან ძალასთან დაპირისპირება მაყურებლისთვის განსაკუთრებით საინტერესო აღმოჩნდა ქვეყანაში არსებული კონტექსტის გათვალისწინებით — ახალგაზრდებში უმუშევრობის მაღალი დონისა და ჩინური საზოგადოებით უკმაყოფილების ფონზე.

"ერთ სცენაში, ნეჯა აცხადებს, ჩემს ბედს ღმერთი კი არა, თავად მე განვკარგავო", — ამბობს იუ, — "ეს ამჟამინდელ სიტუაციასაც შეეფერება, როცა უამრავი ადამიანი სირთულეების წინააღმდეგ მარტო აღმოჩნდა. როცა ქვეყანას არ ულხინს, ხალხი საკუთარ თავზე გადაერთვება ხოლმე".

თუმცა, კინოკრიტიკოსის თქმით, ეს არ ნიშნავს, რომ ჩინელ მაყურებელს პატრიოტული სულისკვეთების ფილმები აღარ აინტერესებს. მეტიც, ზოგიერთი მიმომხილველის აზრით, ნეჯაში ანტიამერიკული სიმბოლოებიცაა გაბნეული.

სამშობლოში ასეთი წარმატების მიუხედავად კი, უცნობია, როგორ მიიღებს ნეჯა 2-ს მაყურებელი საზღვარგარეთ. როგორც The Guardian წერს, ფილმს წარმატების შედარებით მეტი შანსი ექნებოდა ტაივანში, რომელსაც ჩინეთთან საზიარო კულტურული ისტორია აქვს. თუმცა, ქვეყანაში შეზღუდულია ჩინური ფილმების რაოდენობა, რომლის ჩვენებაც მოცემულ წელს შეიძლება — ნეჯა 2 კი წლევანდელ ჩამონათვალში არაა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...