15 მარტს, აშშ-ს პრეზიდენტმა, დონალდ ტრამპმა შვიდი ფედერალური სააგენტოს, მათ შორის USAGM-ის შემცირების ბრძანება გასცა, რომელიც ზედამხედველობს რადიო თავისუფლებას და ამერიკის ხმას. როგორც BBC წერს, ეს მისი "სამთავრობო ბიუროკრატიის" წინააღმდეგ ბრძოლის ნაწილი.

ბრძანებაში, რომელიც გამოქვეყნებულია თეთრი სახლის ვებსაიტზე, ჩამოთვლილია ორგანიზაციები, რომლებმაც უნდა "შეამცირონ თავიანთი ნორმატიული ფუნქციები და პერსონალი კანონით მოთხოვნილ მინიმალურ რაოდენობამდე და ფუნქციებამდე".

მათ შორისაა შეერთებული შტატების გლობალური მედიის სააგენტო (USAGM), რომელიც აკონტროლებს ხუთ მსხვილ ამერიკულ მედიაკორპორაციას, რომლებიც მაუწყებლობენ 49 ენაზე, მათ შორის რადიო თავისუფალი ევროპა/რადიო თავისუფლება და ამერიკის ხმა.

რადიო თავისუფალი ევროპა/რადიო თავისუფლების (RFE/RL) პრეზიდენტის, სტივენ კაპუსის თქმით, ამ ორგანიზაციისთვის დაფინანსების შეწყვეტა იქნება "დიდი საჩუქარი ამერიკის მტრებისთვის".

"ირანელი აიათოლები, ჩინელი კომუნისტი ლიდერები და ავტოკრატები მოსკოვსა და მინსკში იზეიმებდნენ რადიო თავისუფალი ევროპა/რადიო თავისუფლების დაცემას, 75 წელიწადის შემდეგ. ჩვენი მტრებისთვის გამარჯვების გადაცემა მათ გააძლიერებს და ამერიკას დაასუსტებს", — ამბობს კაპუსი თავის განცხადებაში, რომელსაც რადიო თავისუფლება საქართველო ავრცელებს.

აღმასრულებელი ბრძანების გამოქვეყნებიდან რამდენიმე საათში მედიით გავრცელდა USAGM-ის წერილი, რომ გაუქმდა კონგრესის მიერ დამტკიცებული გრანტი, რომლითაც რადიო თავისუფალი ევროპა/რადიო თავისუფლება ფინანსდება.