საქართველოს მესამე პრეზიდენტი, მიხეილ სააკაშვილი საზღვრის კვეთის საქმეზე სასამართლომ 4 წლისა და 6 თვის ვადით პატიმრობა მიუსაჯა.

მოსამართლე მიხეილ ჯინჯოლიამ აღნიშნულ განაჩენს დაუმატა საქალაქო სასამართლოს 12 მარტს მიღებული 8 წლით თავისუფლების აღკვეთის გადაწყვეტილება და ჯამში, ძირითადი სასჯელის სახედ და ზომად 12 წლითა და 6 თვის ვადით თავისუფლების აღკვეთა განესაზღვრა.

"მიხეილ სააკაშვილი ცნობილ იქნეს დამნაშავედ სსკ-ის 344-ე მუხლის პირველი ნაწილით გათვალისწინებული დანაშაულის ჩადენისთვის და განესაზღვროს თავისუფლების აღკვეთა 4 წლითა და 6 თვის ვადით.

საქართველოს სსკ-ის 59-ე მუხლის მე-3 და მე-4 ნაწილების საფუძველზე ამ განაჩენით დანიშნულ სასჯელს ნაწილობრივ დაემატოს 12 მარტის განაჩენით თავისუფლების აღკვეთა 8 წლის ვადით […] და საბოლოო განაჩენის ერთობლიობით განესაზღვროს თავისუფლების აღკვეთა 12 წლით და 6 თვით," — განაცხადა მოსამართლემ.

მოსამართლე ჯინჯოლიამ ისარგებლა "შეკრებითობის პრინციპით" — სისხლის სამართლის კოდექსის ჩანაწერით, რომლის მიხედვით, "თუ დანაშაულთა ერთობლიობა შედგება მძიმე ან განსაკუთრებით მძიმე დანაშაულთაგან, საბოლოო სასჯელის დანიშვნისას ნაწილობრივ ან მთლიანად შეიკრიბება ამ დანაშაულთათვის განსაზღვრული სასჯელები. ამასთან, ვადიანი თავისუფლების აღკვეთის სახით დანიშნული საბოლოო სასჯელის ვადა არ უნდა აღემატებოდეს ოცდახუთ წელს."

სააკაშვილის ადვოკატმა ბექა ბასილაიამ მედიასთან საუბრისას განაცხადა, რომ მოსამართლემ არ განმარტა თუ რატომ გამოიყენა "შეკრებითობის პრინციპი", რადგან რეციდივიც კანონის მიხედვით, "უფრო მძიმე სასჯელი ნაკლებად მძიმე სასჯელს შთანთქავს და მხოლოდ უკიდურეს შემთხვევებშია შესაძლებელი, რომ გარკვეული სასჯელების შეკრება მოხდეს."

"მე ბევრი წელია მსგავსი შემთხვევა არ მქონია, ასევე ჩემი კოლეგებისგან არ მსმენია. სსკ-ის 59-ე მუხლის მიხედვით, დანაშაულთა ერთობლიობის შემთხვევაში სასჯელები შთაინთქმება, მოსამართლემ მკაფიო განმარტება არ გააკეთა რატომ მიიღო ეს გადაწყვეტილება და ახლა გვიტოვებს ჩვენ ვარაუდისთვის სივრცეს, რომ რეციდივს ჰქონდა ადგილი. თუმცა, რეციდივზეც წერია კანონში, რომ უფრო მძიმე სასჯელი ნაკლებად მძიმე სასჯელს შთანთქავს და მხოლოდ უკიდურეს შემთხვევებშია შესაძლებელი, რომ გარკვეული სასჯელების შეკრება მოხდეს, თუმცა ისიც ნაწილობრივ და ამ შემთხვევაში რა გააკეთა — საზღვრის კვეთაზე მაქსიმალურია 4 წელი, 5 წლამდეა, 4 წელს დაუმატა 8 წელი და კიდე 6 თვე და გამოიყვანა 12 წელი და 6 თვე ისეთ ქმედებებზე, რაზეც ქართული ოცნების პირობებშიც, სულ რომ პოლიტიკურად მოტივირებულ დევნას თავი დავანებოთ, მსგავს სასჯელებს ჩვენ ვერ ვნახავთ" — განუცხადა ჟურნალისტებს მიხეილ სააკაშვილის ადვოკატმა.

მიხეილ სააკაშვილი 2021 წლის 1 ოქტომბერს დააკავეს და მისი პატიმრობის ვადის ათვლა სწორედ ამ დღიდან იწყება.

სასამართლო განაგრძობს 7 ნოემბრის საქმის განხილვას.