ოცნების ხელისუფლების განათლების, მეცნიერებისა და ახალგაზრდობის მინისტრ ალექსანდრე წულაძის 12 მარტის ბრძანებით, სკოლებში პერსონალური ინფორმაციის კონტროლისთვის ოფიცრები შეჰყავთ.

წულაძის ხელმოწერილ ბრძანებაში ვკითხულობთ, რომ "ოფიცრის სამუშაო აღწერილობა და ანგარიშვალდებულების საკითხი განისაზღვრება შესაბამისი სკოლის დირექტორის ინდივიდუალური ადმინისტრაციულ-სამართლებრივი აქტით".

"რესურსცენტრის უფროსი რესურსცენტრის სამოქმედო ტერიტორიაზე არსებულ საჯარო სკოლებში, დირექტორის შუამდგომლობის საფუძველზე ინდივიდუალური ადმინისტრაციულ-სამართლებრივი აქტით – ბრძანებით განსაზღვრავს რესურსცენტრის თანამშრომელს, რომელიც უზრუნველყოფს პერსონალურ მონაცემთა დაცვის ოფიცრის ფუნქციების განხორციელებას, რესურსცენტრს დაქვემდებარებული იმ საჯარო სკოლისათვის, რომელსაც არ ჰყავს დანიშნული პერსონალურ მონაცემთა დაცვის ოფიცერი. ოფიცრის სამუშაო აღწერილობა და ანგარიშვალდებულების საკითხი განისაზღვრება შესაბამისი სკოლის დირექტორის ინდივიდუალური ადმინისტრაციულ-სამართლებრივი აქტით — ბრძანებით", ­— ნათქვამია საკანონმდებლო ცვლილებაში.


მასწავლებლის ეროვნული ჯილდოს მფლობელი პედაგოგი როლანდ შავაძე ამბობს, რომ სკოლებში ე.წ. ოფიცრების დანიშვნა "რუსული კაგებეშნიკური მოდელია", რომელიც სკოლებს ისედაც შეზღუდულ თავისუფლებას კიდევ უფრო შეუზღუდავს.

"ამ გადაწყვეტილების მიზანია, ისედაც სახელისუფლებო ინტერესებს დაქვემდებარებული მასწავლებლებისა და სკოლის დირექტორების კიდევ უფრო მეტად მარწუხებში მოქცევა.

ეს არის წმინდა რუსული "კაგებეშნიკური" მოდელი, როცა სახელმწიფო საგანმანათლებლო დაწესებულებაში ზღუდავს შემოქმედებით თავისუფლებას და უნიშნავს პირს, რომელიც აკონტროლებს ყველა ნიუანსს და მუშაობს კონკრეტული ძალის, ამ შემთხვევაში „ქართული ოცნების“ პროპაგანდის გასავრცელებლად", — ამბობს როლანდ შავაძე.