მაშინ როდესაც დისნეი ფიფქიას საეკრანო ადაპტაციის გამო გამოწვეულ კრიტიკასთან გამკლავებას ცდილობს, კულისებში კიდევ ერთი პრობლემა მწვავდება. ფილმის ორ ვარსკვლავს შორის დიდი დაძაბულობაა, რადგან რეიჩელ ზეგლერი პალესტინის მხარდამჭერია, ხოლო გალ გადოთი წარმოშობით ისრაელიდანაა და 2023 წლის 7 ოქტომბერს ჰამასის ისრაელზე თავდასხმის შემდეგ, აქტიურად აფიქსირებს ანტი ჰამასურ პოზიციას. გალ გადოთსა და რეიჩელ ზეგლერს ღაზაში მიმდინარე ომზე საჯაროდ განსხვავებული შეხედულებები აქვთ. როგორც ამბობენ, გადოთი პალესტინის საჯარო მხარდაჭერის გამო რეიჩელ ზეგლერზე განრისხებულიც კი იყო.

ზეგლერმა X-ზე არაერთი პოსტი გამოაქვეყნა წარწერით — "თავისუფლება პალესტინას". მოგვიანებით კი იგივე ინტერვიუებშიც გაიმეორა.

"არ შემიძლია ვუყურო, როგორ იხოცებიან ბავშვები. ჩვენ ვუახლოვდებით 7 ოქტომბერს ისრაელში მომხდარი საშინელი თავდასხმების 1 წლის თავს, მაგრამ მე ამ კონფლიქტს ბევრი წელია ვხედავ. სხვების მსგავსად, მეც ძალიან მწყდება გული ორივე მხრიდან ამდენი სიცოცხლის დაკარგვის გამო" — განაცხადა რეიჩელ ზეგლერმა გასულ ზაფხულს.

თავის მხრივ, გადოთმა 2023 წლის 7 ოქტომბერს ჰამასის ისრაელზე თავდასხმის შემდეგ, პოზიციის დაფიქსირება აქტიურად დაიწყო. მან ლოს-ანჯელესში გავლენიანი პირებისათვის რამდენიმეჯერ ფილმის ჩვენებაც კი გამართა. ფილმში ჰამასის ისრაელზე თავდასხმის კადრებია აღბეჭდილი.

"ვერასდროს წარმოვიდგენდი, რომ შეერთებული შტატებისა და მსოფლიოს სხვა ქალაქებში ვნახავდით ხალხს, რომელიც ჰამასის განსჯის ნაცვლად, მათ გამართლებას, გამხნევებასა და მხარდაჭერას დაიწყებდნენ… საჭიროა, ებრაული საზოგადოების ყველა წევრმა, განურჩევლად პროფესიისა, ხმა აიმაღლონ... ეს ყველას გვეხება, ყველა სფეროში მომუშავე ადამიანს" — განაცხადა გალ გადოთმა.

ცხადია, გადოთისთვის არასასიამოვნოა ზეგლერთან ერთად ფილმის გაპიარება. მიუხედავად იმისა, რომ დუეტმა ოსკარი ერთად წარადგინეს, ისინი ინტერაქციის მინიმუმამდე შემცირებას ცდილობენ.

ცნობისთვის, ზეგლერმა ფიფქიას როლზე დამტკიცების შემდეგ, თავი უხერხულ მდგომარეობაში რამდენჯერმე ჩაიგდო. მაგალითად, მაშინ როდესაც მან ყველასათვის საყვარელი ორიგინალი მულტფილმი გააკრიტიკა.

"მულტფილმი უკიდურესად მოძველებულია, როდესაც საქმე სამყაროში ქალის როლს ეხება. ორიგინალი მულტფილმი 1937 წელს გამოვიდა და ეს ძალიან შესამჩნევია. ანიმაცია დიდ ყურადღებას ფიფქიას სასიყვარულო ისტორიაზე ამახვილებს ბიჭთან, რომელიც სიტყვასიტყვით დასდევს მას. ეს ძალიან უცნაურია. ჩვენ ფილმში ეს სხვაგვარადაა... ჩვენ განსხვავებული მიდგომა გვაქვს იმის მიმართ, რასაც, დარწმუნებული ვარ, ბევრი ადამიანი სასიყვარულო ისტორიად მხოლოდ იმიტომ განიხილავს, რომ ფილმში პრინცი მონაწილეობს" — განაცხადა ზეგლერმა 2022 წელს.

ზეგლერმა სხვა კომენტარებითაც გაანაწყენა დისნეის გულშემატკივრები. მსახიობმა დასცინა ხალხს, რომლებიც მისი ფიფქიას როლზე დამტკიცებით განაწყენდნენ. მან კრიტიკოსებს უწოდა, "დამარცხებულები(losers), რომლებიც მულტფილმის პრინცესების სისხლის სიწმინდის შენარჩუნებით არიან შეპყრობილნი".

ამ დაპირისპირების გამო ფიფქიას პრემიერა შეფერხდა. ზეგლერსა და ფილმის რეჟისორებს შორის შექმნილი დაპირისპირების გამო მიიღეს გადაწყვეტილება, რომ პრემიერა ნაკლებად პომპეზური იყოს და მას მხოლოდ ფოტოგრაფები და ფილმზე მომუშავე ადამიანები დაესწრნენ. ცნობისთვის, საქართველოში ფილმის პრემიერა 20 მარტს შედგება.