მოკლედ: გუშინ, 4 მარტს, ბათუმის ნავსადგურში თურქეთის რესპუბლიკის სამხედრო-საზღვაო ძალების ხომალდი TCG YILDIRIM F-243 შემოვიდა.

დეტალები: როგორც საქართველოს შინაგან საქმეთა სამინისტრო აცხადებს, "ვიზიტის მიზანია, ნატოს ოპერაციული შესაძლებლობების კონცეფციის შეფასებისა და უკუკავშირის პროგრამის ფარგლებში, საქართველოს სასაზღვრო პოლიციის სანაპირო დაცვის დეპარტამენტის მცურავი საშუალებების — ოჩამჩირე და დიოსკურია მეორე დონის თვითშეფასების (SEL-2) ჩატარება.

  • აღნიშნული პროცესი ქართველი და ნატოს სამხედრო-საზღვაო ძალების სარდლობიდან მოვლენილი წარმომადგენლების (შემფასებლების) მხარდაჭერით ხორციელდება", — განაცხადა შსს-მ.
  • მათივე ინფორმაციით, ხომალდის ეკიპაჟს ბათუმის პორტში შსს-ს სასაზღვრო პოლიციის სანაპირო დაცვის დეპარტამენტის დირექტორი, რამაზ პაპიძე, აჭარის მთავრობის თავმჯდომარე თორნიკე რიჟვაძე და ბათუმის მერი არჩილ ჩიქოვანი დახვდნენ.
  • თურქული ხომალდი ბათუმის ნავსადგურს 10 მარტს დატოვებს.