სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.

OC Media-ს რედაქცია ამჯობინებს, არ გამოიყენოს ისეთი ტერმინები, როგორიცაა "დე ფაქტო", "არაღიარებული" ან "ნაწილობრივ აღიარებული", როდესაც სტატია ეხება ოკუპირებულ აფხაზეთს ან ე.წ. სამხრეთ ოსეთს, ასევე, მთიან ყარაბაღს. ეს არ ასახავს რედაქციის პოზიციას მათ სტატუსთან დაკავშირებით.

აფხაზეთის პარლამენტმა მიიღო საკანონმდებლო ცვლილება, რომლის მიხედვით, "საერთაშორისო ხელშეკრულებებს“, პრეზიდენტისა და მთავრობის მიერ ხელმოწერამდე, პარლამენტი დაამტკიცებს.

როგორც ცნობილია, ცვლილება მიზნად ისახავს რუსეთთან შეთანხმებების გაფორმების თავიდან არიდებას, დეპუტატების თანხმობის გარეშე.

ოთხშაბათს ერთხმად მიღებული "საერთაშორისო ხელშეკრულებების შესახებ“ კანონში აღნიშნულია, რომ ნებისმიერი საერთაშორისო ხელშეკრულების პროექტი უნდა წარედგინოს პარლამენტს, მათ ხელმოწერამდე 10 დღით ადრე. პარლამენტის საკონსტიტუციო უმრავლესობით დამტკიცების გარეშე, მათზე ხელმოწერა არ შეიძლება.

ნაციონალისტურმა აფხაზთა სახალხო მოძრაობამ თებერვალში განაცხადა, რომ წამოაყენეს ცვლილებების ინიციატივა, რუსეთთან ახალი შეთანხმების შესახებ გავრცელებული ინფორმაციის გამო, რომლის მიხედვით, რუსეთის გვარდიას აფხაზეთში საზოგადოებრივი წესრიგის დაცვაში შეეძლებოდა მონაწილეობის მიღება.

მსგავსი DRI: გაფორმდა შეთანხმება — საჭიროების შემთხვევაში, აფხაზეთში შევა რუსული ელიტური სპეცრაზმის 500-კაციანი ჯგუფი

ცვლილებები წარადგინა დეპუტატმა ალხას ბარციცმა, რომელმაც ამ ნაბიჯის საჭიროებაც განმარტა — მისი თქმით, იყო შემთხვევები, როდესაც ხელმოსაწერად გამზადებული, ან უკვე ხელმოწერილი შეთანხმებები საზოგადოების კრიტიკის საგანი ხდებოდა.

მისი ეს განცხადება აღიქვეს როგორც ბიჭვინთის აგარაკის შესახებ საკამათო შეთანხმების შესახებ გაკეთებული განცხადება. ეს შეთანხმება პარლამენტის დამტკიცების გარეშე მიიღეს, მოგვიანებით კი ცნობილი გახდა, რომ კოორდინატები არასწორი იყო.

ჟურნალისტებთან საუბრისას ბარციცმა თქვა, რომ ცვლილებები შევიდა "მსგავსი სიტუაციების თავიდან ასაცილებლად“.

ცვლილებები მეორე და საბოლოო მოსმენით მიიღეს პრეზიდენტის ადმინისტრაციის საპარლამენტო წარმომადგენლის, ბატალ აიბას წინააღმდეგობის მიუხედავად.

ჟურნალისტმა ნიზფა არშბამ განაცხადა, რომ საერთაშორისო ხელშეკრულებების შესახებ კანონში შეტანილმა ცვლილებებმა აჩვენა "უნდობლობის უმაღლესი ხარისხი", რაც საკანონმდებლო შტოს აღმასრულებელი შტოს მიმართ — კერძოდ კი, პრეზიდენტ ასლან ბჟანიასა და საგარეო საქმეთა მინისტრის, ინალ არძინბას მიმართ აქვს.

"არსებითად, პარლამენტმა განაცხადა, რომ არ ენდობა პრეზიდენტს საგარეო პოლიტიკასთან დაკავშირებული საკითხების დამოუკიდებლად გადაწყვეტაში“, — წერს არშბა.

გენერალური პროკურორის ყოფილმა მოადგილემ ეშუა კაკალიამ, რომელიც ახლა აიდგილარას საზოგადოებრივ ორგანიზაციას ხელმძღვანელობს, განაცხადა, რომ პარლამენტი მივიდა დასკვნამდე, რომ ვერ ენდობა "აღმასრულებელ ხელისუფლებას, პრეზიდენტის ხელმძღვანელობით".

"სამწუხაროდ, ეს ის რეალობაა, რომელშიც ყველანი აღმოვჩნდებით“, - განაცხადა კაკალიამ.