ქართველმა მუსიკოსმა მებო ნუცუბიძემ, სასცენო სახელით Mebo Renard, ახალი სიმღერა გამოუშვა. ზღვა ადიდდება — ასე ჰქვია ნუცუბიძის საავტორო კომპოზიციას, რომლის პროდიუსერი ბეთხოა (ირაკლი მანჩხაშვილი). სიმღერაზე ვიდეოკლიპი კი გიორგი დეკანოიძემ გადაიღო.

"ჩვენი ცხოვრება თითქოს ზღვას ჰგავს, რომელშიც ყოველ დილით საცურაოდ უნდა გავიდეთ: ზოგს პატარა ნავი ჰყავს, ზოგსაც — დიდი გემი, იახტა. ეს ზღვა უმეტესად ადიდებული და აღელვებულია. ამიტომ, საღამოობით ყველას გვჭირდება ნავსაყუდელი, ადგილი, სადაც ზღვიდან დაბრუნებული სიმშვიდეს ვიპოვით და ცოტა ხნით დავისვენებთ. ეს სიმღერაც ამაზეა — ჩემს მოგზაურობაზე აღელვებულ ზღვაში; როგორ ვეძებ ნავსაყუდელს, რომელიც ხშირად სიყვარულია ხოლმე", — პირველი არხის გადაცემაში ასე ხსნის სიმღერის მნიშვნელობას მუსიკოსი.

მებო ნუცუბიძე ქართველმა მსმენელმა 2014 წელს, პროექტ X ფაქტორით გაიცნო. მუსიკოსი მეგაშოუს პირველი სეზონის ფინალისტი გახდა. მოგვიანებით, მან და ირაკლი მანჩხაშვილმა ექსპერიმენტული პროექტი The BearFox შექმნეს, რომელმაც არსებობის განმავლობაში ერთი მინიალბომი და ერთი ალბომი გამოუშვა.

///

ამ პროექტის დასრულების შემდეგ, 2020 წელს, ნუცუბიძემ ახალი ჯგუფი The Rylans ჩამოაყალიბა. ბენდის სადებიუტო სიმღერას Voices in Your Head და მასზე გადაღებულ ვიდეოკლიპს საზოგადოებაში დიდი გამოხმაურება მოჰყვა. ჯგუფმა 2021 წელს გამოუშვა მინიალბომი Ab Aeterno.

აღსანიშნავია, რომ ნუცუბიძე 4-წლიანი პაუზის შემდეგ სცენასაც უბრუნდება — ახალი სიმღერის გამოშვებასთან ერთად, მუსიკოსმა მომავალი კონცერტი დააანონსა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...