თურქეთმა გააფრთხილა სომხეთი, რომ ის "მიიღებს სერიოზულ ზიანს", თუ აზერბაიჯანთან სამშვიდობო ხელშეკრულებას ვერ უზრუნველყოფს.

ამის შესახებ თურქეთის პარლამენტის თავდაცვის კომიტეტის თავმჯდომარემ, ჰულუსი აკარმა ორშაბათს, ბაქოში ვიზიტისას დროს განაცხადა.

"[სომხეთმა] უნდა მიიღოს აზერბაიჯანის მიერ გაწვდილი სამშვიდობო ხელი, წინააღმდეგ შემთხვევაში, მას სერიოზული ზიანი მიადგება, 2020 წლის ომის მსგავსი", — თქვა მან.

აკარი მანამდე თავდაცვის მინისტრისა და თურქეთის შეიარაღებული ძალების შტაბის უფროსის თანამდებობას იკავებდა.

ამის საპასუხოდ, სომხეთის საგარეო საქმეთა მინისტრის მოადგილემ, ვაჰან კოსტანიანმა სომხეთის საზოგადოებრივ ტელევიზიას განუცხადა, რომ თურქეთს შეუძლია უფრო კონსტრუქციული როლი შეასრულოს ორ ქვეყანას შორის სახმელეთო საზღვრის გახსნის შესახებ, მესამე ქვეყნის მოქალაქეებისთვის და დიპლომატიური პასპორტების მფლობელებისთვის.

შაბათს, 27 იანვარს, აზერბაიჯანის საგარეო საქმეთა მინისტრმა ჯეიჰუნ ბაირამოვმა ადგილობრივ ჟურნალისტებს განუცხადა, რომ აზერბაიჯანმა სომხეთის უახლესი სამშვიდობო წინადადებები იანვრის დასაწყისში მიიღო, ისინი კვლავ პასუხის მზადების პროცესში არიან.

კვირას, 28 იანვარს სომხეთის პრემიერ-მინისტრი ნიკოლ ფაშინიანი გამოვიდა ინიციატივით, ქვეყნებმა ხელი მოაწერონ თავდაუსხმელობის პაქტს, "თუ აღმოჩნდება, რომ სამშვიდობო ხელშეკრულების ხელმოწერას მოსალოდნელზე მეტი დრო დასჭირდება“.

მან, ასევე, გაიმეორა შეთავაზება შეიარაღების ურთიერთკონტროლის მექანიზმის შექმნის შესახებ, აზერბაიჯანის მიერ სომხეთის კრიტიკის საპასუხოდ, რომ ის საფრანგეთისა და ინდოეთისგან იარაღის შეძენას გეგმავს.

ბაქოში ვიზიტის დროს, აკარმა თქვა, რომ გარკვეული ქვეყნები ცდილობდნენ სომხეთის როგორც "პროქსი სახელმწიფოს" აღჭურვას.

29 იანვარს აზერბაიჯანის საგარეო საქმეთა სამინისტროს სპიკერმა აიხან ჰაჯიზადემ უარყო ფაშინიანის ბოლო წინადადებები.

"პოლიტიკური მანიპულაციაა იმის მტკიცება, რომ სომხეთი სერიოზულად უდგება სამშვიდობო პროცესს“, თქვა მან, "იმის გათვალისწინებით, რომ მისი ქვეყანა ახორციელებს სერიოზული მილიტარიზაციის პოლიტიკას, ბოლო წლებში ხელი მოეწერა რამდენიმე მილიარდი დოლარის იარაღის მიწოდების კონტრაქტს და მან განავითარა სამხედრო წარმოება".

"აზერბაიჯანი, თავის მხრივ, გააგრძელებს სამშვიდობო და სამშენებლო ძალისხმევას და სომხეთისგან ელის ადეკვატური ნაბიჯების გადადგმას, არა მხოლოდ სიტყვით, არამედ საქმითაც“, — თქვა ჰაჯიზადემ.

"არაჰუმანიტარული ნაბიჯი"

სამშვიდობო მოლაპარაკებების შეფერხების ფონზე, ორ ქვეყანას შორის დიპლომატიური დაპირისპირება კვლავ ჩნდება.

25 იანვარს სომხეთის ეროვნულმა უსაფრთხოების სამსახურმა (NSS) გამოაცხადა, რომ სომხეთი აზერბაიჯანს გადასცემს ნაღმების ჩანაწერების 8 წიგნს, ნდობის აღდგენის მიზნით.

NSS-ის განცხადებით, სომხეთმა, 2021 წელს, აზერბაიჯანს, დაახლოებით, 972 რუკა გადასცა, სადაც აღნიშნულია სახმელეთო ნაღმების ადგილმდებარეობა "წინაპირობების გარეშე" და რომ "უბრალოდ, სომხეთს არ აქვს უკეთესი ხარისხის რუკები".

მოგვიანებით, იმავე დღეს, აზერბაიჯანის საგარეო საქმეთა სამინისტრომ განაცხადა, რომ სომხეთის განზრახვა "არ იყო ჰუმანიტარული და ეს ნაბიჯი არ შეიძლება ჩაითვალოს ნდობის აღდგენის ღონისძიებად“.

მათ, ასევე, თქვეს, რომ რუკები, რომლებიც მათ სომხეთისგან მიიღეს, იყო მხოლოდ 25%-ით ზუსტი და "არასრული“.

"მოწოდებული რუკები არის არაეფექტური, არასრული და ზუსტად არ ასახავს ადგილზე არსებულ რეალობას“, — ნათქვამია სამინისტროს განცხადებაში.

მათ მოუწოდეს ერევანს, "წარმოადგინოს ზუსტი რუკები“ და მიაწოდოს აზერბაიჯანს ინფორმაცია "უკანასკნელი 30 წლის განმავლობაში გაუჩინარებული 4000-მდე აზერბაიჯანელის ბედზე, ასევე მასობრივი საფლავების ადგილმდებარეობაზე, სადაც აზერბაიჯანელები არიან დაკრძალული“.

ამის საპასუხოდ, სომხეთის საგარეო საქმეთა სამინისტრომ აზერბაიჯანი დაადანაშაულა "თემის მანიპულირების გაგრძელებაში“ და "სომხეთის პოზიტიური ნაბიჯის ესკალაციისა და უარყოფითი რიტორიკის მიზეზად გადაქცევაში“.

NSS-მა ასევე განაცხადა, რომ მათ უკვე აქვთ მიწოდებული ინფორმაცია უგზო-უკვლოდ დაკარგული აზერბაიჯანელების შესახებ და მზად არიან, ამ საკითხზე შემდგომი თანამშრომლობისთვისაც.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.