ქართულმა ულტრამემარჯვენე ჯგუფმა ალტ-ინფომ დაიწყო 233 000 ლარის შეგროვება, ჯარიმის დასაფარად, რომელიც, სავარაუდოდ, 2022 წელს გამოუწერეს. იუსტიციის სამინისტრომ ჯარიმის გადახდა 7 დღის განმავლობაში მოითხოვა.

დოკუმენტში, რომელიც, სავარაუდოდ, იუსტიციის სამინისტროს ეროვნულმა აღსრულების ბიურომ გასცა, ალტ-ინფომ ორშაბათს გაავრცელა. სამინისტრო მოითხოვს, რომ ჯგუფმა ჯარიმა უნდა გადაიხადოს.

დოკუმენტი 25 იანვრით თარიღდება და მასში ნათქვამია, რომ ჯარიმა ადმინისტრაციული ბრალდებით არის დაკისრებული. აქვე აღნიშნულია, რომ გადასახდელია 217 ათასი ლარი ჯარიმა და ასევე, 15 ათასი ლარი, "აღსრულების საფასური".

ჯგუფის ტელეარხზე, წამყვანმა გადაცემისას სთხოვა მაყურებლებს, ფინანსურად დახმარებოდნენ და აღნიშნა, რომ თუ ჯარიმას ვერ გადაიხდიან, "კონსერვატიული მოძრაობის ანგარიშებს დააყადაღებენ და ქონებას ჩამოართმევენ".

მთავრობამ ჯარიმასთან დაკავშირებით კომენტარი არ გააკეთა, მათ არ უპასუხეს OC მედიას კითხვებს, თუმცა ალტ-ინფომ განაცხადა, რომ ეს ჯარიმა 2022 წელს დაუწესეს.

სახელმწიფო აუდიტის სამსახურმა Alt-Info-ს კონსერვატიული მოძრაობა დაადანაშაულა 2021 წლის საგადასახადო დეკლარაციის არასწორად შევსებასა და და არაფულადი შემოწირულებების დამალვაში. მათი თქმით, პარტიამ დეკემბრის თვეში ფინანსური ბრუნვის შესახებ ინფორმაცია არასწორად მიუთითა.

"თუმცა, როგორც გახსოვთ, ოფისების უმეტესობა მათ დეკემბერში გახსნეს", — განუცხადეს მედიას აუდიტის სამსახურში.

აუდიტის სამსახურმა აღმოაჩინა პარტიის მიერ არადეკლარირებული ხარჯები 72,000 ლარის ოდენობით, ხოლო 2022 წლის ივნისში სასამართლომ პარტიას ამ თანხის სამმაგი გადახდა დააკისრა.

ალტ-ინფოს ერთ-ერთმა ლიდერმა კონსტანტინე მორგოშიამ მაშინ განაცხადა, რომ ჯარიმის გასაჩივრებას აპირებენ, მაგრამ საჭიროების შემთხვევაში, მისი გადახდა არ გაუჭირდებათ. "გვყავს დონორები და არც ფუნქციონირება გაგვიჭირდება და არც ამ ჯარიმის პრობლემა შეგვექმნება", — თქვა მან.

მზარდი დაძაბულობა ხელისუფლებასა და ალტ-ინფოს შორის

ჯარიმის გადახდაზე მოთხოვნის შესახებ ინფორმაცია ცნობილი გახდა დაძაბულობის ფონზე, რომელიც ალტ-ინფოსა და მთავრობას შორის სულ უფრო იზრდება.

ორშაბათს ალტ-ინფოს წევრმა შოთა მარტინენკომ თქვა, რომ მისი ანგარიში დაიხურა იმავე დღეს, როდესაც ჯგუფმა მოთხოვნა მიიღო იუსტიციის სამინისტროსგან. მისი ანგარიში იყო ბანკ ქართუში, რომელიც ქართული ოცნების დამფუძნებელმა, ბიძინა ივანიშვილმა დააარსა. მარტინენკომ თქვა, რომ ანგარიში, "სხვა საკითხებთან ერთად", ალტ-ინფოსთვის ფულის შესაგროვებლადაც გამოიყენებოდა.

მარტინენკომ მთავრობა და ივანიშვილი, დასავლეთის სასარგებლოდ, ალტ-ინფოს ღალატში დაადანაშაულა.

"როგორც ჩანს, [ბიძინა ივანიშვილი] დასავლეთთან გარიგებაში შევიდა, რათა მისი პირადი საკუთრების სანქცირების სანაცვლოდ, მზად იყოს რადიკალური, ხისტი დასავლური პოლიტიკის გასატარებლად", — განაცხადა მან.

მისი თქმით, ეს კეთდება ევროკავშირის მოთხოვნებიდან გამომდინარე.

"ეს იყო დასავლეთის პირდაპირი მოთხოვნა, ევროინტეგრაციის ცხრა რეკომენდაციიდან, კანდიდატის სტატუსისთვის […], რომ ჩვენ გავნეიტრალებულიყავით, ჩვენი ტელევიზია, ჩვენი პარტია, ჩვენი პარტიის ლიდერები უნდა დაეპატიმრებინათ”, — თქვა მან.

ევროკავშირის ერთ-ერთი მოთხოვნა იყო ჟურნალისტებზე თავდასხმაზე პასუხისმგებელი პირების პასუხისგებაში მიცემა, მითითებით ალტ-ინფოს მიერ 2021 წლის 5 ივლისის თავდასხმებზე, რომლის დროსაც დაშავდა მედიის 50-ზე მეტი თანამშრომელი. თავდასხმის არც ერთი ორგანიზატორი არ დასჯილა.

მთავრობამ გასულ წლებში, ალტ-ინფოს მიერ საპროტესტო და ძალადობრივი ქმედებების მიმართ რბილი პოზიცია დაიკავა, რამაც მისცა ჯგუფს საშუალება, 2023 წელს დაერბია პრაიდ ფესტივალი ტერიტორიაზე, რომელიც კერძო საკუთრებას წარმოადგენდა.

თუმცა, ჯგუფის მიერ გამართულ აქციებზე, თებერვლის დასაწყისში, დიდი რაოდენობით პოლიციელები იყვნენ წარმოდგენილი. ეს კი, ალტ-ინფოს ლიდერების განცხადებით, "ღალატი იყო".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.