მოკლედ: საყდრისის კომიტეტი კულტურული მემკვიდრეობისთვის საქართველოს მთავრობას და კულტურის მინისტრს, თეა წულუკიანს მოუწოდებს, მეტი ინფორმაცია მიაწოდონ საზოგადოებას ისტორიულ ტაო-კლარჯეთში ქართულ ძეგლებთან დაკავშირებით.

  • საყდრისის კომიტეტი მათ შეახსენებს კულტურის სფეროში საქართველოს და თურქეთის მთავრობებს შორის მიმდინარე პროგრამას 2024-2028 წლებისთვის.

დეტალები: პროგრამა, რომელიც საქართველოში 2017 - 2021 წლებში მოქმედებდა, 2024 წელს განახლდა, თუმცა, საყდრისის კომიტეტის თქმით, კულტურის მინისტრმა თეა წულუკიანმა ხელშეკრულებას ხელი მოაწერა საზოგადოებაში წინასწარი განხილვისა და დისკუსიის გარეშე.

  • მათივე თქმით, უცნობია საქართველოს საპატრიარქოს ოფიციალური პოზიციაც ამ საკითხთან დაკავშირებით.
  • საყდრისის კომიტეტის მიხედვით, 2017-2021 წლების თანამშრომლობის პროგრამის ფარგლებში, თურქულმა მხარემ 4 მილიონ დოლარზე მეტი საბიუჯეტო სახსარი გამოყო, რის შედეგადაც, მათი მხრიდან, აღდგა იშხანი, გამაგრდა ოშკი, რეაბილიტაცია ჩაუტარდა პარხალს.
  • ასევე, დაწყებულია პროცედურები ტბეთის მოვლა-შენარჩუნების მიზნითაც.
  • "სანაცვლოდ საქართველოს ტერიტორიაზე ოსმალური პერიოდის ოთხ ძეგლს ჩაუტარდება სამშენებლო-სარესტავრაციო სამუშაოები", — წერს კომიტეტი.

საყდრისის კომიტეტის თქმით, ამჟამად უცნობია, რა პირობებს აყენებს თურქეთი, თუმცა, აღნიშნავს, რომ წინა წლებში არსებული შეთანხმების გათვალისწინებით "ტაო-კლარჯეთის ქართული ტაძრების აღდგენის შემთხვევაში, თურქული მხარე ქობულეთის რაიონის სოფელ კვირიკეში ჯამეს, ახალციხეში, რაბათის ტერიტორიაზე და სამცხეში მეჩეთებს აღადგენდა, ხოლო ბათუმში დამწვარი აზიზის მეჩეთის ნაცვლად პრაქტიკულად ხელახლა აშენდებოდა მეჩეთი".

ბოლო ხაზი: საყდრისის კომიტეტი კულტურული მემკვიდრეობისთვის ასევე, ამბობს, რომ მიესალმება მხარეებს შორის კულტურის სფეროში თანამშრომლობის პროგრამის განახლებას: "სწორედ ურთიერთთანამშრომლობისა და კომუნიკაციის არქონას მოჰყვა ქართული კულტურული მემკვიდრეობისათვის ისეთი სავალალო შედეგები, როგორიც იყო კავკასიძეების ციხის და ჭალის ეკლესიის ჩაძირვა ისტორიული მესხეთის ნაწილის — ტაოს ტერიტორიაზე", — წერს საყდრისის კომიტეტი.