მოკლედ: შიდა ქართლში 15 წლის ბავშვმა იმშობიარა. ინფორმაციას "მოზაიკა" ავრცელებს.

მშობიარობის შემდეგ, ბავშვიც და დედაც, რეგიონული სამშობიაროდან თბილისში გადმოიყვანეს.

არასრულწლოვანი გოგონა არაოფიციალურად იყო "დაოჯახებული".

რატომ არის ეს მნიშვნელოვანი: ეს არ არის ნაადრევ ასაკში მშობიარობის ერთეული შემთხვევა.

  • ბავშვობაში ქორწინება პრობლემაა მთელს ქვეყანაში, თუმცა, რეგიონებში — მეტად.
  • ჯერ კიდევ 2018 წელს, ქალაქის ტიპის მაცხოვრებელი 20-24 წლის ასაკის ქალების 8% "დაქორწინებული" იყვნენ 18 წლის ასაკამდე;
  • იმავე პარამეტრებით, სოფლის ტიპის დასახლებებში ქალების 25% იყო "დაქორწინებული", ან იმყოფებოდა არარეგისტრირებულ ქორწინებაში სრულწლოვანი ასაკის მიღწევამდე.

განახლებული მონაცემებით:

  • საქსტატის 2021 წლის ანგარიშით, 15-დან 19 წლის ასაკის ქალებში შობადობის ასაკობრივი კოეფიციენტია 24.8 — ასე ითვლის სახელმწიფო გარკვეული ასაკის მიერ გაჩენილი ბავშვების საშუალო რიცხოვნობას, შესაბამისი ასაკის 1 000 ქალზე.
  • გაეროს მოსახლეობის ფონდის (UNFPA) საქართველოს ოფისის 2022 წლის მონაცემებით, ბავშვობის ასაკში ქორწინების საშუალო მაჩვენებელი ქვეყნის მასშტაბით 14%-ს აღწევს.
  • 2022 წელს, 815 არასრულწლოვანი ორსული დარეგისტრირდა, აქედან 434-იმშობიარა.
  • 2022 წელს, ადრეულ ასაკში ქორწინების 400 შემთხვევაა აღრიცხული და ეს მონაცემი მკვეთრად აღემატება გასულ წლებში შესწავლილი საქმეების რაოდენობას, — წერს სახალხო დამცველი — აქედან შსს-მ შესაძლო ადრეულ ასაკში ქორწინების 171 ფაქტზე დაიწყო გამოძიება.

პრობლემაა, რომ:

  • UNFPA-ს მიხედვით, არასრულწლოვანთა შესაძლო ნიშნობის შემთხვევაში, უწყებების მხრიდან, უმეტესად ვერ ხერხდება სავარაუდო ქორწინების იძულების გამოკვეთა;
  • საქმეთა უმეტესობაში გაფორმდა საპროცესო შეთანხმება. კერძოდ, 39 საქმიდან, 29 საქმეზე (74%) დაიდო საპროცესო შეთანხმება;
  • საპროცესო შეთანხმების გაფორმების პრაქტიკა, განსაკუთრებით მაღალია სრულწლოვანის მიერ 16 წლის ასაკს მიუღწეველთან სქესობრივი კავშირის დამყარებისა და თავისუფლების უკანონო აღკვეთის დანაშაულებზე;