სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.

აფხაზეთის უშიშროების საბჭოს მდივანმა სერგეი შამბამ ინტერვიუში განაცხადა, რომ საჭიროა დიალოგი,"კონფლიქტის დასაძლევად“.

ოთხშაბათს, ქართველმა ჟურნალისტმა ვანო ჩოკორაიამ, საქართველო-აფხაზეთის კონფლიქტზე, შამბასა და აფხაზეთის ავტონომიური რესპუბლიკის უმაღლესი საბჭოს წევრ ვახტანგ ყოლბაიასთან 21 წუთიანი ინტერვიუ ჩაწერა.

შამბამ, რომელიც მანამდე იყო აფხაზეთის საგარეო საქმეთა მინისტრი და პრემიერ-მინისტრი, განაცხადა, რომ როდესაც არის პრობლემა, პირველ რიგში, საჭიროა საუბარი.

"არ არსებობს მეზობელი, ახლობელი, ან, თუნდაც მონათესავე ერები, რომლებსაც ერთმანეთთან ბრძოლა არ ჰქონიათ. ამის მაგალითია მთელი ევროპა", - აღნიშნა მან.

შამბამ ასევე თქვა, რომ მიუხედავად იმისა, რომ აფხაზეთსა და საქართველოში ბევრი ადამიანია "აგრესიულად განწყოფილი", მაინც იქნებოდა შესაძლებელი "ქმედებების დაწყება ურთიერთგაგებისკენ".

"მე ყოველთვის მხარს ვუჭერდი სახალხო დიპლომატიას და როცა საგარეო საქმეთა მინისტრი ვიყავი, ჩვენი წარმომადგენლები ძალიან ხშირად ხვდებოდნენ ქართველ ოპონენტებს. ეს იყო ერთმანეთის პოზიციების გაგების შესაძლებლობა. ძალიან მნიშვნელოვანია ამ პროცესის დაწყება, რათა როგორმე წინ წაიწიოს საკითხი. მე მაინც ამის მომხრე ვარ”, — თქვა მან.

ინტერვიუში ყოლბაიამ გაიხსენა აფხაზეთის პრეზიდენტი ასლან ბჟანია, რომელიც საუბრობდა "ეკონომიკური ურთიერთობების დამყარებაზე, რასაც შეიძლებოდა გამოეწვია კონკრეტული ქმედებები“.

მან, ასევე, აღნიშნა, რომ ბჟანიამ 2020 წლის წინასაარჩევნო კამპანიის დროს განაცხადა, რომ აფხაზებსა და ქართველებს სჭირდებოდათ დიალოგი ჟენევის საერთაშორისო დისკუსიების მიღმა, რაც ერთადერთი ფორმატის საკომუნიკაციო არხია საქართველოსა და აფხაზეთსა და სამხრეთ ოსეთს შორის.

ბჟანიას ჰქონდა საქართველოსთან მრავალფორმატიანი მოლაპარაკებების შეთავაზება, როგორც აფხაზეთის საგარეო პოლიტიკური დოკუმენტის ნაწილი, მაგრამ მოგვიანებით, იძულებული გახდა, შეეჩერებინა მსჯელობა, აფხაზეთის ოპოზიციის მწვავე კრიტიკის ფონზე.

პოლემიკა აფხაზეთსა და საქართველოში

ინტერვიუმ აფხაზეთსა და საქართველოში მედიისა და პოლიტიკური მოღვაწეების ყურადღება მიიპყრო, მმართველი პარტია "ქართული ოცნების“ საპარლამენტო ფრაქციის თავმჯდომარემ მამუკა მდინარაძემ განაცხადა, რომ "პირდაპირ უნდა ვესაუბროთ ჩვენს აფხაზ და ოს ძმებს და შევრიგდეთ“.

ოპოზიციური პარტია "ევროპული საქართველოს“ თავმჯდომარემ, გიგა ბოკერიამ გააკრიტიკა ყოლბაია ინტერვიუში მონაწილეობის გამო და განაცხადა, რომ "ჟენევის მოლაპარაკებებში მხარეები მხოლოდ რუსეთი და საქართველო არიან — ეს ჩვენთვის პრინციპული პოზიცია იყო და კვლავ უნდა დარჩეს პრინციპულ პოზიციად დღევანდელი ხელისუფლებისთვის”.

შამბას განცხადებებს კრიტიკა მოჰყვა აფხაზეთშიც, სადაც თემურ გულიამ, ვეტერანთა ორგანიზაციის Aruaa-ს თავმჯდომარემ, რადიო თავისუფლებას განუცხადა, რომ ის "აბსოლუტურად დარწმუნებულია, რომ აფხაზეთის რესპუბლიკას არ შეუძლია კომუნიკაცია აფხაზეთის დევნილობაში მყოფი ხელისუფლების წარმომადგენლებთან, ნებისმიერ ფორმატში".

"მე მქონდა კითხვა: არის თუ არა ეს დიალოგი სანქცირებული ჩვენი ქვეყნის ხელმძღვანელობის მიერ? უშიშროების საბჭოს მდივანი არის საჯარო მოხელე და მისი სიტყვები მიჩნეულია აფხაზეთის რესპუბლიკის უმაღლესი სამხედრო-პოლიტიკური ხელმძღვანელობის ოფიციალურ განცხადებად", — თქვა მან.