რა ხდება: სამდღიანი ინტენსიური დაბომბვის შემდეგ, ისრაელის სახმელეთო ძალები ღაზის სამხრეთ ნაწილისკენ მიიწევს. ისრაელის არმია უკვე ქალაქ ხან იუნისის ჩრდილოეთით ატარებს ოპერაციებს. ინფორმაციას ისრაელის თავდაცვის ძალები (IDF) ადასტურებს.

დეტალები: გენერალ-ლეიტენანტ ჰერცი ჰალევი ღაზის დივიზიის რეზერვისტებს ესაუბრა. მან ჯარისკაცებს უთხრა, რომ ჩრდილოეთ ღაზაში ძლიერად იბრძოლეს, ახლა კი იგივე ღაზის სამხრეთში უნდა გაიმეორონ.

  • IDF-ის წარმომადგენელმა, მოგვიანებით, თქვა, რომ ისრაელი აგრძელებს სახმელეთო ოპერაციის გაფართოებას ღაზის მთელ ტერიტორიაზე, რომლის ფარგლებში, ჯარისკაცებს "ტერორისტებთან ბრძოლა პირისპირაც უწევთ".

რა ხდება ახლა ღაზის სამხრეთით: მას შემდეგ, რაც ერთკვირიანი ზავი ამოიწურა, ისრაელმა დაბომბვა განაგრძო. საჰაერო თავდასხმას, ხან იუნისის მოსახლეობა აფასებს, როგორც თავდასხმების ყველაზე ძლიერ ტალღას, რაც კი ქალაქში აქამდე უნახავთ.

  • ცეცხლის შეწყვეტის შვიდდღიანი შეთანხმების ფარგლებში, ჰამასმა 110 მძევალი გაათავისუფლა, სანაცვლოდ კი ისრაელმა ციხეებიდან 240 პალესტინელი პატიმარი გამოუშვა.
  • გუშინ დილით, ისრაელის არმიამ ხან იუნისის მოსახლეობის ნაწილს ევაკუაციისკენ მოუწოდა. ისრაელი დარწმუნებულია, რომ ჰამასის ხელმძღვანელი პირები ქალაქში იმალებიან, სადაც ახლა ასობით ათასი ადამიანია. მათი უმეტესობა ჩრდილოეთიდან, ომის დასაწყისში, ისრაელის დაბომბვას გამოექცა.
  • UNICEF-ის წარმომადგენელი ჯეიმს ელდერი ამბობს, რომ ნასერის სამედიცინო ჰოსპიტალი, ხან იუნისში, ბრძოლის ველად იქცა. მან BBC-სთან თქვა, რომ საავადმყოფოსთან ახლოს გაუჩერებლად ისმის აფეთქების ხმა, კლინიკაში მიჰყავთ ბავშვები დაზიანებებით თავის არეში და მძიმე დამწვრობებით.
  • "ამ საავადმყოფოში მე ხშირად დავდიოდი, ოჯახები და ბავშვები მიცნობდნენ. ახლა ეს ხალხი მთხოვს, სადმე უსაფრთხო ადგილას წავიყვანო. სად არის უსაფრთხო ადგილი?!", — ამბობს ელდერი.

ბოლო ხაზი: პალესტინის ჯანდაცვის სამინისტროს ინფორმაციით, ღაზაში, ზავის ამოწურვის შემდეგ, 500 ადამიანი მოკლეს.

  • ომის დაწყებიდან დღემდე კი მსხვერპლი 15 500 პალესტინელს აჭარბებს.
  • ისრაელმა ღაზის დაბომბვა ჰამასის თავდასხმების შემდეგ, 7 ოქტომბერს დაიწყო. ისრაელში ჰამასმა 1200 ადამიანი მოკლა, 240 კი მძევლად წაიყვანა.