საკონსტიტუციო სასამართლოს შესახებ კანონში ცვლილებების ძალაში შესვლის შემდეგ, საკონსტიტუციო სასამართლოს პირველი კოლეგიის 2016 წლის 7 ივნისს დანიშნული სხდომა, რომელზეც გიგი უგულავას, ნუგზარ კაიშაურის, დავით წიფურიას, გიზო ღლონტის, გიორგი ლობჟანიძისა და არჩილ ალავიძის საქმეების სარჩელების არსებითი განხილვა იყო დაგეგმილი, მოსამართლის მიერ ამ საქმის კოლეგიისგან აცილებისა და პლენუმისთვის გადაცემის გამო გადაიდო:

"გადადების საფუძველს წარმოადგენს საკონსტიტუციო სასამართლოს შესახებ საქართველოს კანონის 211-ე მუხლის მე-3 პუნქტი. კერძოდ, აღნიშნული ნორმის საფუძველზე საკონსტიტუციო სასამართლოს პირველი კოლეგიის წევრის მიერ დაყენებული წერილობითი შუამდგომლობა N740 და N764 კონსტიტუციური სარჩელების საქართველოს საკონსტიტუციო სასამართლოს პლენუმისთვის განსახილველად გადაცემის მოთხოვნით".

აღნიშნულ საკითხზე საბოლოო გადაწყვეტილებას მიიღებს საკონსტიტუციო სასამართლოს პლენუმი, 7 დღის ვადაში.

საკონსტიტუციო სასამართლოს შესახებ კანონში ცვლილებების შესვლის შემდეგ, ამოქმედდა ნორმა, რომლის მიხედვითაც, ერთ მოსამართლეს შეუძლია კოლეგიაში საქმის განხილვის ნებისმიერ ეტაპზე საქმე პლენუმს გადასცეს განსახილველად.

საკონსტიტუციო სასამართლოს შესახებ კანონში ცვლილებები პარლამენტმა მესამე მოსმენით, 81 ხმით, 14 მაისს მიიღო და ის პრეზიდენტის ხელმოსაწერად გადაუგზავნა. თავის მხრივ პრეზიდენტმა, ვენეციის კომისიის დასკვნის შემდეგ, კანონპროექტს ვეტო დაადო და პარლამენტს დაუბრუნა.

მიუხედავად იმისა, რომ პარლამენტმა პრეზიდენტის ვეტოში ასახული შენიშვნები გაიზიარა და კანონი, მათი გათვალისწინებით, 84 ხმით მიიღო, არასამთავრობო ორგანიზაციები და ოპოზიციის წევრები ამბობენ, რომ მარგვლაშვილმა თავის ვეტოში ვენეციის კომისიის დასკვნაში ასახული ყველა შენიშვნა არ გაითვალისწინა.