რუსეთის განათლების სამინისტრომ ისტორიის სახელმძღვანელოებში ცვლილებები შეიტანა, რომლის თანახმად, მეორე მსოფლიო ომის დროს ჩრდილოეთ კავკასიიდან გადასახლებული ადამიანები მოხსენიებულები არიან, როგორც "ნაცისტების თანამშრომლები".

სახელმძღვანელომ ვნებათაღელვა გამოიწვია ჩრდილოეთ კავკასიაში, საიდანაც რამდენიმე ერის დეპორტაცია მოხდა ციმბირსა და ცენტრალურ აზიაში მეორე მსოფლიო ომის დროს, კოლაბორაციონიზმის ბრალდებით.

მათ შორის არიან ყარაჩაელები, ბალყარელები, ინგუშები, ჩეჩნები, ყირიმელი თათრები, ყალმუხელები, მათი მთელი მოსახლეობა გადაასახლეს. დეპორტაციას კი თან სდევდა ადამიანების დიდი რაოდენობის გარდაცვალება. ჩეჩნებისა და ინგუშების გადასახლება ევროპის პარლამენტმა გენოციდის აქტად ცნო.

მეათე კლასის ისტორიის სახელმძღვანელოში აღნიშნულია, რომ გადასახლებული ერები კოლექტიურ დასჯას ექვემდებარებოდნენ დეპორტაციის გზით, ქვეთავში, რომელიც გადასახლებას ეთმობა, წერია, რომ "არა მხოლოდ ბანდიტები და კოლაბორაციონისტები იყვნენ რეპრესირებული, არამედ ბევრი უდანაშაულო ადამიანიც. ისინი აწყდებოდნენ ბევრ სირთულეს. სამართალი მათთვის 1953 წელს აღდგა".

ჩეჩნეთის ლიდერი, რამზან კადიროვი ღიად აკრიტიკებდა სახელმძღვანელოს, მან გამართა დისკუსია განათლების სამინისტროსთან აღნიშნულ ქვეთავში შეტანილი ცვლილების შესახებ.

სახელმძღვანელოს წინააღმდეგ ისაუბრა ჩეჩნეთის პარლამენტის სპიკერმა, მაგომედ დაუდოვმაც. მისი თქმით, გადასახლებულმა ერებმა დიდი წვლილი შეიტანეს გერმანიის წინააღმდეგ ბრძოლაში.

"საბედნიეროდ, ჩვენს ქვეყანაში ადამიანების შეურაცხყოფა მიუღებელია, მით უფრო, ადამიანების, რომლებმაც შეიტანეს ფასდაუდებელი წვლილი სახელმწიფოებრიობის განმტკიცებასა და სამშობლოს ინტერესების დაცვაში", — დაწერა დაუდოვმა "ტელეგრამზე".

დაუდოვმა ასევე თქვა, რომ საბჭოთა კავშირის მიერ დეპორტირებული ქვეყნების წარმომადგენლებმა შექმნეს ერთობლივი სამუშაო ჯგუფი, რომლებიც მოამზადებენ ცვლილებებს საკამათო თავთან დაკავშირებით.

19 ოქტომბერს, მაგომედ მუცოლგოვმა, ინგუშური უფლებადამცველი ორგანიზაციის Mashr-ის ხელმძღვანელმა, დაწერა განცხადება და მოსთხოვა პროკურატურას, სახელმძღვანელო ექსტრემიზმის გამო შეემოწმებინა.

ასევე ინგუშეთში, გაუგზავნეს მიმართვა ინგუშეთის პარლამენტს და სთხოვეს, შეექმნათ საექსპერტო კომისია სახელმძღვანელოს შესაფასებლად და შეეჩერებინათ მისი გავრცელება, სანამ მისი "უზუსტობები" არ გამოსწორდება.

ქალაქ მაგასის ყოფილმა მერმა, ბესლან ცეჩოევმა მიმართა სახელმძღვანელოს ერთ-ერთ ავტორს, ვლადიმირ მედინსკის, რუსეთის პრეზიდენტის, ვლადიმირ პუტინის თანაშემწეს და უთხრა, რომ ქვეთავი, სადაც გადასახლებაა განხილული, "შეურაცხმყოფელი და უსამართლოა".

ყარაჩაი-ჩერქეზეთში, ყარაჩაელი მოსახლეობის კონგრესმა სექტემბერში მიმართა სახელმწიფო დუმას, შეეჩერებინა სახელმძღვანელოს გავრცელება.

"რა თქმა უნდა, ეს არის საბჭოთა კავშირის მიერ დეპორტირებული ერების შეურაცხყოფა, რომელთა შვილებმაც მრავალეროვანი საბჭოთა ხალხისთვის ვაჟკაცურად იბრძოლეს", — ნათქვამია ყარაჩაის კონგრესის განცხადებაში.

რუსულმა საინფორმაცი სააგენტომ RBC გაავრცელა ინფორმაცია, რომ განათლების სამინისტროს მიერ სახელმძღვანელოს შემოწმებამ დაადასტურა, რომ მისი შინაარსი შეესაბამებოდა რუსეთის საგანმანათლებლო სტანდარტებს.

თუმცა, რუსეთის განათლების სამინისტრომ სახელმძღვანელოში, გადასახლების შესახებ თავში ცვლილება, ოქტომბერში გამოაქვეყნა.

ცვლილებების შედეგად, წიგნში აღარ არის აღნიშნული გადასახლებული ერები, ან ეთნიკური ჯგუფები. ამის ნაცვლად, მათ შეცვალეს შინაარსი და დაწერეს, რომ "ცალკეულ მოღალატეებსა და მტრის მხარეს გადასულ ადამიანებთან ერთად, ტანჯვა მიადგა სრულიად უდანაშაულო და ერთგულ ადამიანებს, მათ შორის მათ, ვინც წითელ არმიაში იბრძოდა".

ცვლილებები მოიწონეს კავკასიურმა ეთნიკურმა ჯგუფებმა, მათ შორის, ყარაჩაის კონგრესმა, რომელმაც შესწორებას "არსებითი და სამართლიანი" უწოდა.

10 ნოემბერს, რუსეთის განათლების მინისტრი, სერგეი კრავცოვი ჩეჩნეთს ესტუმრა, რათა ცვლილება კადიროვთან განეხილა, რომელმაც შესწორება მოიწონა.

"სერგეი კრავცოვმა მაჩუქა ხელახლა გამოცემული ისტორიის მეათე კლასის სახელმძღვანელო. ყველა შეცდომა გასწორებულია და უხეში ენა, რომელიც წინა გამოცემაში მიმართული იყო სტალინის რეპრესიების ქვეშ მყოფი ხალხის მიმართ, ამოღებულია", — დაწერა კადიროვმა ტვიტერზე.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.