ქარელის რაიონში, სოფელ ავლევის ტერიტორიაზე, იქ სადაც მოსახლეობა ხორბალს თესავს და სასოფლო სამეურნეო საქმიანობას ეწევა, რუსმა სამხედროებმა საზღვრის აღმნიშვნელი ორი ახალი ბანერი დაამონტაჟეს.

აღნიშნულ ინფორმაციას ქარელის გამგებელი ზაზა გულიაშვილი On.ge-სთან საუბარში ადასტურებს. მისი თქმით, ტერიტორიის ის ნაწილი, სადაც მოსახლეობა მიწას ამუშავებდა, ბანერს მიღმა დარჩა:

"2008 წლის შემდეგ, ამ ტერიტორიას მოსახლეობის გარკვეული ნაწილი ამუშავებდა, ისიც პოლიციის დახმარებით, პოლიციის გარეშე ვერ მიდიოდნენ და ტექნიკა ვერ მიჰყავდათ. ახლა ჩასვეს ის ორი ბანერი. მიწის გარკვეული ნაწილი დამუშავებულია, დიდი ნაწილი ისევ დაუმუშავებელი, რადგან მოსახლეობას შიში ჰქონდა და ვერ მიდიოდა".

ქარელის გამგებლის წარმომადგენელი, ნოდარ კოკოლაშვილი ჩვენთან საუბარში ამბობს, რომ სამხედროები იქ 6 ივნისს მივიდნენ და დაიწყეს ბანერის მონტაჟი:

"ბანერთან ახლოს ვერ მივდივართ და როგორც ვიცით, იქ აღნიშნულია, რომ ე.წ. საზღვრის გადაკვეთა აკრძალულია. იქ სამხედროები პატრულირებენ და ვერიდებით. იმ დროს, როცა ამონტაჟებდნენ, დაახლოებით 150 მეტრიდან ვუყურებდით. იმ ტერიტორიაზე მოსახლეობას ხეხილის ბაღები ჰქონდა და ხორბალსაც თესავდა".