მოკლედ: პეტიცია, 10 000 ხელმომწერით, მიზნად ისახავს, აიკრძალოს სკოლებში ჯანმრთელობისთვის საზიანო პროდუქტებით ვაჭრობა და დაინერგოს სასკოლო კვების პროგრამა, — აცნობეს On.ge-ს ორგანიზაციიდან განათლების კოალიცია.

დეტალები: პეტიციის ხელმომწერები მოითხოვენ,

  • სკოლებში მოქმედ ბუფეტებში დაუყოვნებლივ შეწყდეს ჯანმრთელობისთვის ზიანის მომტანი საკვებით ვაჭრობა.
  • სურსათის ეროვნული სააგენტოს რეგულარულად ამოწმებდეს ბუფეტებში გასაყიდი პროდუქციის შემადგენლობას, ხარისხს და შეწყდეს საზიანო საკვებით ვაჭრობა.
  • განათლების სამინისტრომ დაჩქარებული წესით დანერგოს ჯანსაღი სასკოლო კვების პროგრამა და ეს პროცესი გამჭვირვალე იყოს.
  • განათლების სამინისტროსთან ერთად, ხელმოწერილი მოთხოვნები წარედგინება პარლამენტს, სურსათის ეროვნულ სააგენტოს, ჯანდაცვის სამინისტროსა და სახალხო დამცველის აპარატს.

რატომ არის მნიშვნელოვანი? სასკოლო კვება მთელ მსოფლიოში განიხილება არა როგორც პრივილეგია, არამედ — მოსწავლეთა უფლება.

ის აუმჯობესებს:

  • ბავშვის საკვებ რაციონსა და ჯანმრთელობას;
  • ამაღლებს აკადემიურ მოსწრებას;
  • მოსწავლეებისთვის უფრო მიმზიდველ ადგილად ხდის სკოლას.

სტრიქონებს შორის: საქართველო, მსოფლიოს ქვეყნების იმ 10%-შია, სადაც
სასკოლო კვების პროგრამა ჯერ არ დანერგილა.

ჯანდაცვის სამინისტროს 2020 წლის დოკუმენტის მიხედვით, კვების ობიექტები საჯარო სკოლების მხოლოდ 30%-შია, რომელთა უმეტესობა თბილისსა და სხვა ურბანულ დასახლებებშია. სოფლად კი, სკოლების დაახლოებით 90%-ს ბუფეტი საერთოდ არ აქვს.

რა არის საჭირო მოსწავლეთა უფასო კვებისთვის? კონსულტაციისა და ტრენინგის ცენტრის მიერ, 2021 წელს მომზადებული დოკუმენტის მიხედვით,

  • ქვეყნების უმრავლესობა გამოყოფს სახსრებს მოსწავლის კვების
    დაფინანსებისთვის.
  • ეს დანახარჯი, ქვეყნის ეკონომიკური განვითარების მიხედვით, 42-
    დან 242 დოლარის ფარგლებში მერყეობს.
  • საქართველოს მსგავსი შემოსავლების ქვეყნების გამოცდილების გათვალისწინებით, სასკოლო კვების ღირებულება ერთ მოსწავლეზე, მთელი წლის განმავლობაში, სულ მცირე 140 ლარს შეადგენს.