რა მოხდა: 13 სექტემბერს გვანცა გულიაშვილმა სოციალურ ქსელში დაწერა, რომ ილიას ბავშვთა და მოზარდთა განვითარების ინსტიტუტის ბენეფიციარებს განუცხადეს, რომ ცენტრი იხურება.

• "უნდა დაინგრესო, ხალხო. ამას გვიცხადებენ სწავლის დაწყების წინა დღეს და ასზე მეტ აუტისტ ბავშვს ტოვებენ თერაპიების გარეშე", — წერდა ის.
• "აგიხსნით ეს რას ნიშნავს: დიაბეტის მქონე ადამიანისთვის ინსულინის შეწყვეტას, მართვით სუნთქვაზე მყოფისთვის აპარატის გათიშვას, თირკმლის უკმარისობის მქონეთათვის დიალიზის არ გაკეთებას, ანუ სასიცოცხლო მნიშვნელობის ქცევით თერაპიებს უწყვეტენ ბავშვებს და მოზარდებს", — განმარტავდა გულიაშვილი.
• მისივე თქმით, არ არსებობდა არანაირი გეგმა, შეთავაზება და ალტერნატივა, სადაც ბავშვების გადაყვანას შეძლებდნენ.
• ამ პოსტში საუბარია ილიას სახელმწიფო უნივერსიტეტის C კორპუსზე, რომელიც ჭავჭავაძის გამზირზე მდებარეობს, სწორედ იქ იყო ცენტრი განთავსებული.
• ამ ინფორმაციას მოქალაქეთა მხრიდან არაერთი კითხვა მოჰყვა, ვინაიდან ვიზუალურად ამ კორპუსს დაზიანებები არ ეტყობა — დაიწყო საუბარი იმაზე, რომ შესაძლოა ეს ხელისუფლების მორიგი ანგარიშსწორებაა კრიტიკულად განწყობილი უნივერსიტეტის მიმართ.

ილიას სახელმწიფო უნივერსიტეტის განმარტებით, აკრედიტებული საექსპერტო კომპანიის დასკვნის მიხედვით, C კორპუსში სასწავლო-კვლევითი ან ნებისმიერი პროცესის წარმართვა საფრთხის შემცველია, შენობა არ აკმაყოფილებს სეისმომედეგი მშენებლობის მოთხოვნებს და მისი ექსპლუატაცია საფრთხის შემცველია.

• მათივე განცხადებით, მიიღეს გადაწყვეტილება, რომ ახალი სასწავლო წლისთვის სრულად დახურონ C კორპუსი, რომელიც 2014 წელს დაარსდა და სადაც სერვისს ბავშვის განვითარების ინსტიტუტის 180-მდე ბენეფიციარი იღებს.
• რადიო თავისუფლების ინფორმაციით, უნივერსიტეტის კანცლერმა, ქეთევან ლეკირბაიამ ჟურნალისტებთან განმარტა, რომ დასკვნა მათი დაკვეთით მომზადდა და მის საფუძველზე სტუდენტები უკვე გადანაწილდნენ სხვა კორპუსებში, ხოლო ბავშვის განვითარების ინსტიტუტის საკითხზე მოლაპარაკებები მიმდინარეობს.
• "ბავშვის განვითარების ინსტიტუტს სჭირდება სპეციფიკური სივრცეები — სენსორული ოთახი, თერაპიის ოთახები, ამიტომ მათი გადანაწილება ჩვეულებრივ საკლასო ოთახებში ვერ ხერხდება, შესაბამისად, სხვადასხვა მხარესთან მიმდინარეობს მოლაპარაკებების პროცესი, რომ ბენეფიციარებისა და სპეციალისტების ინტერესების გათვალისწინებით, რაც შეიძლება უმტკივნეულოდ მოხდეს მათი გადანაწილება", — ლაკირბაიას ამ ციტატას ფორმულა ავრცელებს.
• გარდა ამისა, ილიაუნის კანცლერმა ნეტგაზეთთან განმარტა — დასკვნაში არ წერია, რომ შენობა უნდა დაინგრეს და ახლა სწორედ იმის გასარკვევი პროცედურები მიმდინარეობს, რა გადაწყვეტილება უნდა მიიღონ.

ბავშვის განვითარების ინსტიტუტი თავის განცხადებაში წერს, რომ ეს ინფორმაცია მათთვის ძალიან მტკივნეულია.

• "წლების განმავლობაში, ჩვენ ამ ინსტიტუტის შენებასა და განვითარებაში დიდი ადამიანური და ემოციური რესურსი ჩავდეთ. თუმცა ემოციების მიღმა, მაშინ როცა არჩევანი დგას ბავშვების უსაფრთხოებასა და მათთვის აუცილებელი სერვისების უწყვეტად მიწოდებას შორის, ჩვენგან რაციონალური გადაწყვეტილების მიღება და შესაბამისი მოქმედება გახდა საჭირო", — ვკითხულობთ განცხადებაში.
• მათივე განმარტებით, ამ ეტაპზე მუშაობენ ყველა დაინტერესებულ მხარესთან და შესაბამის ცენტრებთან, რომ მაქსიმალურად სწრაფად და ოპტიმალურად მოხერხდეს ინსტიტუტის ყველა ბენეფიციარისა და სპეციალისტის გადანაწილება ანალოგიური სერვისების მიმწოდებელ ცენტრებში.

თბილისის მერია აცხადებს, რომ საქმის კურსში 12 სექტემბერს ჩააყენეს და თუ ცენტრი ვერ უზრუნველყოფს ალტერნატიული ფართის მოძიებას და პროგრამის ფარგლებში სერვისის მიწოდებას, ბავშვები და მოზარდები, მათი სურვილისამებრ, მერიის პროგრამის განმახორციელებელ სხვა ცენტრებში გადანაწილდებიან და არ მოხდება მათთვის თერაპიის სეანსების შეწყვეტა.'

• მათივე ინფორმაციით, ამ ცენტრში მერიის აუტიზმის სპექტრის დარღვევის მქონე ბავშვთა და მოზარდთა აბილიტაციის პროგრამის ფარგლებში, მომსახურებას 82 ბენეფიციარი იღებს.