რადიო თავისუფლება ფინურ პორტალ Yle-ზე დაყრდნობით წერს, რომ შვედეთი სამხედრო ხომალდს გაგზავნის ფინეთის ყურეში, რათა დაეხმაროს ფინეთს ელექტროკაბელის, EstLink 2-ის დაზიანების გარემოებათა გამოსაძიებლად.

ცნობისთვის, ფინეთის ეროვნულმა საგამოძიებო ბიურომ გასული წლის ბოლოს დააკავა ტანკერი Eagle S, რომელიც ეჭვმიტანილია ელექტროკაბელის, EstLink 2-ისა და ოთხი საკომუნიკაციო კაბელის დაზიანებაში. პოლიცია ვარაუდობს, რომ ხომალდმა ფსკერზე ჩაუშვა ღუზა და განზრახ მიათრევდა მას ათეულობით კილომეტრის მანძილზე, რათა დაეზიანებინა კაბელები.

Eagle S კუკის კუნძულების დროშის ქვეშ დაცურავს, მისი ოპერატორი კი არაბთა გაერთიანებული საამიროს კომპანია Caravella LLC-FZ-ია. ტანკერის ეკიპაჟი საქართველოსა და ინდოეთის მოქალაქეებისგან შედგება, გემის კაპიტანი კი ქართველი დავით ვადაჭკორიაა. ფინეთის პრესის თანახმად, ის შეკითხვებზე პასუხს თავს არიდებს და ამბობს მხოლოდ, რომ ეკიპაჟი თავს კარგად გრძნობს.

რადიო თავისუფლება ფინურ პრესაზე დაყრდნობით წერს, რომ ტანკერი Eagle S რუსეთის ე. წ. ჩრდილოვანი ფლოტის ნაწილია და ის გამოიყენება რუსული ნავთობის ტრანსპორტირებისთვის საერთაშორისო სანქციების გვერდის ავლით.