ამერიკელი მკვლევარი მარკ დიკი, რომელიც თურქეთის ერთ-ერთ მღვიმეში კვირაზე დიდხანს იყო ჩარჩენილი, მაშველებმა გადაარჩინეს. როგორც მკვლევარი იხსენებს, მღვიმეში 2 სექტემბერს ჩავიდა და მალევე კუჭის გაუსაძლისმა ტკივილმა შეაწუხა, რასაც ღებინებაც მოჰყვა. ჯანმრთელობის გაუარესების გამო 40 წლის მკვლევარს გამოქვაბულიდან გამოსვლა აღარ შეეძლო.

მარკი 9 დღის განმავლობაში მორკას კარსტულ მღვიმეში 1040 მეტრის სიღრმეზე იმყოფებოდა. მარკის გადასარჩენად სამაშველო ოპერაციაში მსოფლიოს სხვადასხვა ქვეყნიდან 200-მდე ადამიანი იყო ჩართული, რომელთა შორისაც ექიმები და ექსპერტები იყვნენ.

ფოტო: The Guardian

"მიწისქვეშ იმაზე დიდხანს მომიწია ყოფნა, ვიდრე ველოდი. ჩემს ცნობიერებას უფრო და უფრო უჭირდა გაძლება და ბოლოს იმ აზრამდეც მივედი, რომ ვერ გადავრჩებოდი. ეს ჯოჯოხეთური და გიჟური თავგადასავალი იყო, მიწის ზედაპირზე ყოფნა კი საოცარია", — განაცხადა გადარჩენილმა მკვლევარმა.

მარკ დიკი უკვე წლებია, მღვიმეების შესწავლით არის დაკავებული. მორკას მღვიმე კი თურქეთში სიღრმით მესამეა, რომელიც დაახლოებით 1300 მეტრამდე აღწევს. მაშველების თქმით, ეს ერთ-ერთი ყველაზე დიდხნიანი და რთული მიწისქვეშა სამაშველო ოპერაცია იყო, რომელშიც აქამდე მონაწილეობა მიუღიათ. საბედნიეროდ, მარკს სამედიცინო დახმარება მალევე აღმოუჩინეს და ახლა მის სიცოცხლეს საფრთხე აღარ ემუქრება.