7 პოლიციელი და 4 სამოქალაქო პირი ემსხვერპლა დღეს, 7 ივნისს, დილის პიკის საათში სტამბოლში მომხდარ აფეთქებას. BBC-ის ცნობით, თავდამსხმელთა სამიზნე პოლიციელთა ავტობუსი იყო, რომელიც პოლიციის განყოფილებიდან სტამბოლის უნივერსიტეტისკენ მიემართებოდა. ოფიციალური ინფორმაციით, დანაღმული ავტომობილი დისტანციურად იმ დროს ააფეთქეს, როცა პოლიციელთა ავტობუსმა ჩაიარა.

ჯერჯერობით, თავდასხმაზე პასუხისმგებლობა არცერთ დაჯგუფებას არ აუღია, თუმცა, რეჯეპ ტაიპ ერდოღანის თქმით, "თავს დაესხნენ იმ ადამიანებს, რომლებსაც ხალხის უსაფრთხოების უზრუნველყოფა ევალებათ".

ეს არის მეოთხე მასშტაბური აფეთქება 2016 წელს თურქეთში, რომელსაც მსხვერპლი მოჰყვა. ერთ-ერთ წინა აფეთქებაზე, პასუხისმგებლობა ქურთების ტერორისტულმა დაჯგუფებამ აიღო.