ახალი კვლევის მიხედვით, ვლად მე-3 ცეპეში, ასევე ცნობილი როგორც გრაფი ვლად დრაკულა, არა მხოლოდ "სისხლს მოწყურებული" და დაუნდობელი ლიდერი იყო, არამედ იტანჯებოდა იშვიათი დაავადებით, რომლის გამოც ტირილისას სისხლიან ცრემლებს გამოყოფდა.

მეცნიერებმა ეს აღმოჩენა გააკეთეს ვლად მე-3 ცეპეშის 3 წერილის ქიმიური ანალიზის შედეგად.

მკვლევრებმა გამოიყენეს ტექნიკა, სახელწოდებით მასობრივი სპექტრომეტრია, რომელიც გულისხმობდა ეთილენ-ვინილის აცეტატის, პოლიმერის ფრთხილად წასმას ასოებზე, შემდეგ კი მის მოცილებას. საუკუნეების წინანდელი ქაღალდიდან ეთილენის აცეტატმა შეაგროვა ცილებისა და უფრო მცირე მოლეკულების, პეპტიდების, ნარჩენები. ამ პროცესში გამოვლინდა ნარჩენი, რომელიც შეიცავდა 500 პეპტიდს, რომელთაგან 100 ადამიანური წარმოშობისაა. სავარაუდოდ, ამ პეპტიდების წარმოშობის წყარო იყო თავად ვლადი და არა ის ადამიანები, რომლებსაც, შესაძლოა, ამ წერილებთან ჰქონოდათ შეხება.

"ვერ უარვყოფთ, რომ ამ დოკუმენტებს, შესაძლოა, შუა საუკუნეებში მცხოვრები მეტი ადამიანი შეეხო, მაგრამ, სავარაუდოდ, ყველაზე მნიშვნელოვანი უძველესი ცილები უნდა უკავშირდებოდეს ვლად მე-3 ცეპეშს, რომელმაც დაწერა ეს წერილები და ხელი მოაწერა მათ", — განმარტეს მკვლევრებმა.

დოკუმენტები შეიცავს პეპტიდებს, რომლებიც დაკავშირებულია სილიოპათიებთან, გენეტიკური დარღვევების ჯგუფთან, რომელიც გავლენას ახდენს უჯრედებში თმის მსგავს ორგანელებზე, სილიებზე. მათ ასევე აღმოაჩინეს მტკიცებულება, რომ ვლადს, შესაძლოა, ჰქონოდა სასუნთქი გზების ინფექცია.

თუმცა, ყველაზე დიდი აღმოჩენა გააკეთეს წერილიდან, რომელიც გრაფმა დაწერა ახ.წ. 1475 წელს. წერილი მოიცავდა სამ პეპტიდს, რომლებიც ნაპოვნია ბადურასა და ცრემლების ცილებში. ამ პეპტიდების მახასიათებლებზე დაყრდნობით, მკვლევრებმა დაასკვნეს, რომ "დრაკულა", სავარაუდოდ, დაავადებული იყო ჰემოლაკრიით — მდგომარეობით, რომლის დროსაც ადამიანი ტირილისას გამოყოფს სისხლიან ცრემლს.

მკვლევრებმა ზუსტად არ იციან, რამ გამოიწვია გრაფში ეს დაავადება, მაგრამ, ვარაუდობენ, რომ ეს შეიძლება უკავშირდებოდეს თვალის დაზიანებას ან ბაქტერიულ კონიუნქტივიტს, თვალის ლორწოვანი გარსის ინფექციას.

აღსანიშნავია, რომ ცნობილი "გრაფი დრაკულას" ჯანმრთელობის მდგომარეობის შესახებ პირველად ჩატარდა მსგავსი ტიპის კვლევა და მისი დასკვნები ჟურნალ Analytical Chemistry-ში გამოქვეყნდა.