რა მოხდა: 27 ივლისს ბათუმში სოჭიდან გამოსული რუსული გემი Astoria Grande ჩამოვიდა.

  • კრუიზის რუსი მგზავრები მედიებთან საუბრისას არ აღიარებდნენ საქართველოს ოკუპაციას და აფხაზეთს ცალკე სახელმწიფოდ მოიხსენიებდნენ.
  • გემს მოქალაქეები პროტესტითა და შეძახილებით დახვდნენ, ოკუპანტი ქვეყნის მოქალაქეებს ბათუმის დატოვება აქციის ფონზე მოუწიათ.
  • რამდენიმე დღის წინ გავრცელდა ინფორმაცია, რომ რუსული გემი ბათუმში 31 ივლისსაც შემოვიდოდა, ამჯერად რუს პროპაგანდისტ არტისტებთან ერთად, რომლებიც პუტინისა და კრემლის პოლიტიკას უჭერენ მხარს.
  • შესაბამისად, მორიგი აქცია დაიგეგმა.

რა ხდებოდა ღამით: 31 ივლისს ღამით პოლიციამ ბათუმის ნავსადგურის შესასვლელი ჯებირებით გადაკეტა და ადგილზე ათეულობით სამართალდამცავი განათავსა.

  • ამ ფორმით მათ დილისთვის დაგეგმილი აქციის მონაწილეებს შეუზღუდეს გადაადგილების უფლება და გემთან ახლოს მისვლის საშუალება არ მისცეს.
  • ამის გამო გვიან ღამით ნავსადგურთან აქტივისტები შეიკრიბნენ და რუსული გემის შემოსვლასთან ერთად, პოლიციის ქმედებებიც გააპროტესტეს.
  • იყო შეხლა-შემოხლა, დააკავეს რამდენიმე ადამიანი (ზუსტი რაოდენობა უცნობია).

რა მოხდა დილით: გამთენიისას ბათუმის ნავსადგურთან პროტესტის მონაწილეთა რაოდენობა გაიზარდა. მოქალაქეები ბანერებით, საქართველოს, უკრაინისა და ევროკავშირის დროშებით შეიკრიბნენ.

  • ოკუპანტი ქვეყნიდან ჩამოსული ტურისტებისა და პროპაგანდისტების გასაგონად ისინი რუსულად სკანდირებდნენ: რუსულო გემო, იდი ნა ხ*ი და პუტინ ხუილო".
  • ამ დროს ქართული პოლიცია რუს პროპაგანდისტებს როგორც გემს გარეთ, ასევე, შიგნით იცავდა — ჩვენს კადრებში ჩანს, რომ რუსულ გემზე რამდენიმე ქართველი პოლიციელი იყო ასული.
  • ნავსადგურში დილიდან იყო მობილიზებული ავტობუსი და მიკროავტობუსი — ცოტა ხნის წინ პოლიციამ კორდონი გააკეთა და რუსეთიდან ჩამოსულებს ტერიტორია სწორედ ამ ავტობუსითა და მიკროავტობუსით დაატოვებინა და სავარაუდოდ, სასეირნოდ წაიყვანა.
  • აქციის მონაწილეებმა მათ კვერცხები და ბოთლები დაუშინეს, რის შემდეგაც მოქალაქეებსა და პოლიციელებს შორის სიტუაცია კიდევ დაიძაბა — გაგრძელდა დაკავებებიც.
  • "ნაგავი ვესროლე რუსების მანქანას", — ასე პასუხობს აქციის ერთ-ერთი მონაწილე კითხვას, რატომ დააკავეს.
  • ლელოს წევრი, ირაკლი კუპრაძე ფეისბუქგვერდზე ვიდეოს ავრცელებს და წერს, რომ ასევე, დააკავეს უკრაინის მოქალაქე, რომელსაც წაართვეს ტელეფონი, პირადი ნივთები და არ აძლევდნენ დარეკვის შესაძლებლობას.

პროტესტის შემდეგ კრუიზის ვებგვერდიდან ბათუმის მიმართულება ამოიღეს.

  • მიმართულებებში ჯერ კიდევ მითითებულია საქართველო, თუმცა აგვისტოდან იანვრის ჩათვლით დაგეგმილ ტურებში ბათუმის ნავსადგურის გაჩერება აღარ ჩანს.