ჰოლივუდური ნაწარმი რომ რამდენიმე ქვეყანაში გამუდმებით ხდება ხოლმე განხილვის საგანი, ეს უთუოდ გეცოდინებათ. გასულ წელს, მაგალითად, ჩინეთში, ჯადოსნური ცხოველების მესამე ნაწილის პრემიერამდე, ფილმიდან "გეი მომენტები" ამოჭრეს. მოგვიანებით, საუდის არაბეთმა, მალაიზიამ და არაბთა გაერთიანებულმა საამიროებმა პიქსარის ანიმაცია Lightyear ლესბოსელი წყვილის კოცნის სცენის გამო აკრძალეს. თუმცა, როგორც ჩანს, ტექნოლოგიების განვითარებასთან ერთად, ასეთი რადიკალური ზომების მიღება უფრო იშვიათად ხდება საჭირო. აი, ფილმი ოპენჰაიმერი სულ ახლახან რამდენიმე ქვეყანამ CGI-ის გამოყენებით დააცენზურა.

საქმე ისაა, რომ კრისტოფერ ნოლანის ახალგამოსული ბლოკბასტერის ერთ-ერთ სცენაში ინგლისელი მსახიობი ფლორენს პიუ წელზემოთ შიშველი ჩნდება. ეს კადრი ინდოეთისა და შუა აღმოსავლეთის ქვეყნებისთვის იმდენად აღმაშფოთებელი აღმოჩნდა, რომ გადაწყვიტეს, მსახიობი თავად შეემოსათ. ჰოდა, პიუს ნახევრად შიშველ პერსონაჟსაც კომპიუტერულად გენერირებული შავი კაბა ჩააცვეს.

შუა აღმოსავლეთსა და ინდოეთში ფილმებში სიშიშვლის ასახვა აკრძალულია. ინდოეთში კი ოპენჰაიმერი სექსის სცენის ჩვენებისთვისაც გააკრიტიკეს და ეს "ინდუიზმზე თავდასხმად" შეაფასეს, რადგან ეპიზოდში მონაწილე მსახიობს ხელში ძველინდური ეპოსი, ბჰაგავადგიტა, უკავია.

კრიტიკისა და დაცენზურების მიუხედავად, ოპენჰაიმერი წლის ერთ-ერთ მთავარ კინომოვლენად იქცა. ფილმმა პრემიერიდან სულ რამდენიმე დღეში $82 მილიონზე მეტი გამოიმუშავა.

ოპენჰაიმერი, რომელიც ნოლანისთვის მე-12 ფილმი და პირველი ბიოგრაფიული ნამუშევარია, პულიცერის პრემიის მფლობელ წიგნს ეფუძნება. კაი ბერდისა და მარტინ ჯ. შერვინის წიგნი American Prometheus: The Triumph and Tragedy of J. Robert Oppenheimer ატომური ბომბის შემქმნელი ჯ. რობერტ ოპენჰაიმერის ცხოვრებაზე გვიყვება. კინოსურათში მთავარ როლებს კილიან მერფი, მეთ დეიმონი, ემილი ბლანტი, რობერტ დაუნი უმცროსი და რამი მალეკი ასრულებენ.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...