გერმანიის საკანონმდებლო ორგანომ დღეს, 292 ხმით 226-ის წინააღმდეგ, მხარი დაუჭირა კანონს, რომელიც უზრუნველყოფს ქვეყანაში ქორწინების თანასწორობას ყველა პირისთვის. ამიერიდან, ჰომოსექსუალები შეძლებენ დაქორწინებას ჰეტეროსექსუალთა მსგავსად, მათ ექნებათ ზუსტად იგივე უფლებები, რაც სხვებს, მათ შორის, შვილად აყვანის უფლება.

გერმანია გახდა მეთოთხმეტე ქვეყანა ევროპაში, რომელმაც ქორწინების თანასწორობას მხარი დაუჭირა. პირველი ქვეყანა, რომელმაც აღნიშნული გააკეთა, იყო ნიდერლანდები 2001 წელს.

გერმანიაში მოსახლეობის დიდი ნაწილი უკვე დიდი ხანია მხარს უჭერს ქორწინების თანასწორობას, თუმცა, მმართველი პარტია, რომელსაც წარმოადგენს კანცლერი ანგელა მერკელი, კონსერვატორული შეხედულებების გამო, ამ ცვლილებას ეწინააღმდეგებოდა. თუმცა, რამდენიმე დღის წინ თავად ანგელა მერკელმა თქვა, რომ დეპუტატებმა ხმის მიცემისას უნდა იხელმძღვანელონ სინდისის კარნახით და არა - პარტიული პოზიციით. ანალიტიკოსები მიიჩნევენ, რომ სწორედ მერკელის ამ განცხადებამ მისცა ძლიერი ბიძგი ქორწინების თანასწორობაზე კანონის მიღებას. დოიჩე ველეს ინფორმაციით, თავად მერკელმა აღნიშნული კანონის წინააღდეგ მისცა ხმა.