ერთობლივი წერილით ისინი პრეზიდენტს, სალომე ზურაბიშვილს, პრემიერმინისტრს, ირაკლი ღარიბაშვილსა და პარლამენტის თავმჯდომარეს, შალვა პაპუაშვილს მიმართავენ.

რატომ არის მნიშვნელოვანი: 6 თებერვალს თბილისის საქალაქო სასამართლომ მიხეილ სააკაშვილს პატიმრობის გადავადებაზე უარი უთხრა.

  • ყოფილი პრეზიდენტის ოჯახის წევრები, ექიმები და ადვოკატები ექსპრეზიდენტის ჯანმრთელობის მდგომარეობის მკვეთრ გაუარესებაზე საუბრობენ და საზღვარგარეთ მის სამკურნალოდ გადაყვანას ითხოვენ.
  • ამავე თხოვნით საქართველოს ხელისუფლებას უკრაინის პრეზიდენტმა, საგარეო უწყებამ და ომბუდსმენმა არაერთხელ მიმართეს.

დეტალები: ევროპარლამენტარები გამოხატავენ შეშფოთებას სააკაშვილის ბოლო სასამართლო პროცესიდან გავრცელებული კადრების გამო და წერენ, რომ ცალსახაა მისი ჯანმრთელობის მდგომარეობის სწრაფი და მძიმე გაუარესება.

  • "გვჯერა, რომ სააკაშვილის ჯანმრთელობის მდგომარეობის გაუარესება აშკარა მანიშნებელია იმისა, რომ მისი ამჟამინდელი სამედიცინო ღონისძიებები არც უზრუნველყოფს და არც ხელს უწყობს მის სწრაფ გამოჯანმრთელებას", — ნათქვამია წერილში.
  • მათივე თქმით, მნიშვნელოვანია, სიტუაციის გამოსასწორებლად გადაუდებელი ზომები ხელისუფლებამ სასწრაფოდ მიიღოს.
  • "სასწრაფოდ მოგიწოდებთ, მხარი დაუჭიროთ ერთადერთ მორალურად სამართლიან და ქმედით გადაწყვეტილებას: ყოფილი პრეზიდენტის, სააკაშვილის გადაყვანას ევროკავშირის ერთ-ერთ წევრ ქვეყანაში, სადაც მას შეუძლია, მიიღოს საჭირო და შესაბამისი სამედიცინო დახმარება".
  • ევროპარლამენტარების განცხადებით, ელოდებიან, რომ საქართველო გამოხატავს ერთგულებას საერთო ევროპული ღირებულებების მიმართ.
  • "საქართველოსა და ევროკავშირს შორის ნებისმიერი შემდგომი ინტეგრაცია ეფუძნება ფუნდამენტური ჰუმანიტარული პრინციპების, მათ შორის ძირითადი ადამიანური თანაგრძნობისა და ყოველი ინდივიდის უფლებას, მიიღოს სათანადო სამედიცინო დახმარება".