რა ხდება: პროკურატურა თანაინვესტირების ფონდის ყოფილ უფროსს 2017 წელს 8 258,13 ბიტკოინის მართლსაწინააღმდეგო მითვისებას ედავება, რომლის ღირებულებაც იმ პერიოდში 39 215 820 დოლარი იყო.

• მათი ცნობით, 2015 წლის ზაფხულში ბაჩიაშვილმა პირადად მობილიზებული და ინვესტორის გაცემული თანხებით კრიპტოვალუტა — ბიტკოინის გამომუშავება/მაინინგში ინვესტიცია განახორციელა.
• ამბობენ, რომ მაინინგის მომსახურების უზრუნველყოფას უცხოური კომპანია ახდენდა, რომელთანაც ბაჩიაშვილის ფაქტობრივ მფლობელობაში მყოფმა საწარმომ 2015 წლის ივლისში ხელშეკრულება გააფორმა.
• "ხელშეკრულების ღირებულებად 6 305 000 დოლარი განისაზღვრა, საიდანაც ივესტორის კუთვნილი თანხა შეადგენდა 5 000 000 დოლარს, ხოლო ბრალდებულის — 1 305 000".

პროკურატურა აცხადებს, რომ შეთანხმების საფუძველზე, ბაჩიაშვილს თანხების ინვესტირების ტექნიკური განხორციელება დაევალა, მისაღები მოგება მხარეებს შორის ინვესტირებული თანხების პროპორციულად უნდა განაწილებულიყო.

• უწყების ცნობით, 1 წლიან პერიოდში 24 661,85 ბიტკოინი გამოიმუშავეს, საიდანაც ინვესტორის მიერ სუფთა მოგების სახით მისაღები კრიპტოვალუტა 8 253,23 ბიტკოინი იყო.
• სწორედ ამ ბიტკოინების მითვისებას ედავებიან ბაჩიაშვილს.
• ასევე, ამბობენ, რომ დაუფლებული აქტივების უკანონო წარმოშობის დაფარვის მიზნით, კრიპტოვალუტები სხვადასხვა საფულეებზე გადაიტანა, ნაწილი გაანაღდა, ასევე, სხვადასხვა ეკონომიკურ თუ სხვა სახის ურთიერთობაში ჩართო და ა.შ.
• ამის შედეგად კი დამალა და შენიღბა მისი ნამდვილი ბუნება, წარმოშობის წყარო, ადგილმდებარეობა, განთავსება, მოძრაობა და სხვა.
• სისხლისსამართლებრივი დევნა დიდი ოდენობით კრიპტოვალუტის მართლსაწინააღმდეგო მითვისებისა და უკანონო შემოსავლის ლეგალიზაციის ფაქტებზე დაიწყო, რაც 9-დან 12 წლამდე თავისუფლების აღკვეთას ითვალისწინებს.
• "პროკურატურა ბრალდებულის მიმართ შესაბამის აღკვეთის ღონისძიების შეფარდების მოთხოვნით, სასამართლოს კანონით დადგენილ ვადაში მიმართავს", — ნათქვამია განცხადებაში.

ვინ არის გიორგი ბაჩიაშვილი: მან 2013 წელს დააფუძნა თანაინვესტირების ფონდი და 2019 წლამდე აღმასრულებელი დირექტორის პოზიციას იკავებდა.

• ამავე წლიდან ის მრჩეველთა საბჭოს თავმჯდომარე გახდა.
• თანაინვესტირების ფონდამდე ბაჩიაშვილს ეკავა აღმასრულებელი დირექტორის მოადგილის თანამდებობა საპარტნიორო ფონდში.

რას წერს ივანიშვილის ადვოკატი: დღეს თეიმურაზ წიქვაძემ პოსტი გამოაქვეყნა, სადაც გიორგი ბაჩიაშვილთან კავშირზე საუბრობს.

• როგორც წიქვაძე წერს, ბაჩიაშვილი ივანიშვილთან დედამისის თხოვნის შემდეგ დასაქმდა, 13 წელი მუშაობდა მის კუთვნილ სტრუქტურებში, იყო ივანიშვილთან "ძალიან დაახლოებული პირი" და "სარგებლობდა განსაკუთრებული ნდობით".
• აბსურდულს უწოდებს იმ ბრალდებებს, რომ ივანიშვილის მიერ სამართლებრივი მექანიზმის გამოყენება ბაჩიაშვილის პოლიტიკურ შეხედულებებს უკავშირდება.
• "იმ უტყუარი ფაქტობრივი მოცემულობის გათვალისწინებით, რომ ჩემს მარწმუნებელს ბატონ ბაჩიაშვილთან ჰქონდა მხოლოდ საქმიანი ურთიერთობები (და არც ბრალდებული გამოირჩეოდა რაიმე ინტერესით პოლიტიკური შინაარსის მქონე საკითხებისა თუ პროცესების მიმართ), მიმდინარე სისხლისსამართლებრივი დევნის დაკავშირება ბატონი ბაჩიაშვილის პოლიტიკურ შეხედულებებთან არის ყოვლად უსაფუძვლო ბრალდება".
• "ამავდროულად, დაზარალებული მხარისთვის გასაკვირი არ არის ბრალდებული პირის ამგვარი ტაქტიკა. იმ პირობებში, როდესაც ბატონ ივანიშვილთან, თავის დროზე, ძალიან დაახლოებული პირის (რომელიც ჯერ კიდევ მოსკოვში იქნა დასაქმებული ჩემი მარწმუნებლის მიერ და მას შემდეგ მრავალი წლის განმავლობაში მუშაობდა მის კუთვნილ სტრუქტურებში) მხრიდან ადგილი აქვს წინამდებარე განცხადებაში აღწერილ ქმედებებს, ცხადია, მისგან მოსალოდნელია ყველაფერი".

ჰესის საქმე: ამავე პოსტიდან ვიგებთ, რომ ივანიშვილი თანაინვესიტრების ფონდის ყოფილ ხელმძღვანელს კრიპტოვალუტის საქმის გარდა, ჰესის საქმესაც ედავება.

• წერს, რომ 2014 წელს თანაინვესტირების ფონდმა მტკვარი ჰესის მშენებლობა წამოიწყო, პროექტი სრულად შეისყიდა, რასაც ბაჩიაშვილი ხელმძღვანელობდა.
• ადვოკატი ამბობს, რომ თავდაპირველი გათვლებით, საინვესტიციო მოცულობა დაახლოებით 131 მილიონი დოლარი იყო და ჰესი ექსპლუატაციაში ჯერ კიდევ 2020 წელს უნდა შესულიყო.
• "საბოლოო ჯამში, პროექტის მშენებლობის ღირებულება დაგეგმილთან შედარებით 100 მილიონი დოლარით (რაც კოლოსალური სხვაობაა თავდაპირველ ღირებულებასთან შედარებით), დაახლოებით 235 მილიონ დოლარამდე გაიზარდა და ამის მიუხედავად, პროექტი დღემდე დასრულებული არ არის".
• ადვოკატის ვარაუდით, ფონდის ხელმძღვანელმა პირებმა საინვესტიციო თანხა არამიზნობრივად გახარჯეს, გაფლანგეს ან მიითვისეს.
• "ცხადია, აღნიშნულმა გარემოებამ გააჩინა ეჭვები პროექტის და ზოგადად ფონდის ხელმძღვანელის გიორგი ბაჩიაშვილის კეთილსინდისიერების მიმართ. ჩემს მარწმუნებელს ჰქონდა აღნიშნულთან დაკავშირებით კომუნიკაცია ბრალდებულ ბაჩიაშვილთან და განუცხადა კიდეც მას, რომ ჩადენილ ქმედებებზე მოუწევდა პასუხის გაცემა, ისევე როგორც სხვა პირებს, რომლებიც ჩართულნი იყვნენ არაკეთილსინდისიერ და დანაშაულებრივ საქმიანობაში".
• მისივე თქმით, "რომც არ ყოფილიყო სახეზე" კრიპლოვალუტაში ინვესტირებასთან დაკავშირებული გარემოებები, ივანიშვილის განზრახული ჰქონდა ჰესის საკითხზე სამართლებრივი რეაგირება".