რამდენიმე დღის წინ, ატლანტის ოკეანეში გაუჩინარებული წყალქვეშა ნავის მფლობელი კომპანიის, OceanGate-ის, დამფუძნებელმა და ხელმძღვანელმა სტოკტონ რაშმა, როგორც ჩანს, იცოდა, რომ ხომალდი ტიტანი წესების დარღვევით იყო აგებული. მომხდარი კი, რომელსაც თავად რაშიც ემსხვერპლა, სავარაუდოდ, სწორედ ამან გამოიწვია. ამ დროისთვის ვიცით, რომ კატასტროფა, რომელმაც ტიტანი და მისი მგზავრები შეიწირა, ხომალდს შიგნით მიმართული აფეთქების შედეგი უნდა ყოფილიყო.

• რატომ და როგორ მოხდა ტიტანზე შიგნით მიმართული აფეთქება და რა ბედი ეწიათ მგზავრებს

რაშმა ჯერ კიდევ ორი წლის წინ განაცხადა, რომ ნავი "წესების დარღვევით" იყო შექმნილი, რადგან დამზადებისას ნახშირბადის ბოჭკო იყო გამოყენებული და არა სუფთა მეტალი. თუმცა, იგი იმედოვნებდა, რომ ექსპერიმენტული პროექტი გაამართლებდა და ინოვაციად იქცეოდა.

"მგონი, გენერალმა მაკართურმა თქვა, წესების დარღვევით ამახსოვრდები ხალხსო", — ამბობდა რაში მაშინ, — "ვფიქრობ, რომ წესები ლოგიკითა და ინჟინერიის კარგი ცოდნით დავარღვიე. ნახშირბადის ბოჭკო და ტიტანი? წესით, ეს არ უნდა ქნა. თუმცა, ვქენი".

ნახშირბადის ბოჭკო ხშირად გამოიყენება საავიაციო ინჟინერიაში, მაგრამ წყალქვეშა ნავებს უმეტესწილად მყარი მეტალებისგან, მაგალითად, ფოლადის ან ტიტანისგან ამზადებენ. თუმცა, რაშს სურდა, რომ ძვირადღირებული, მაგრამ გამძლე მასალები ექსპერიმენტული ალტერნატივით ჩაენაცვლებინა.

ირკვევა ისიც, რომ OceanGate-ის წყალქვეშა ნავის უსაფრთხოების საკითხი არაერთხელ დაუყენებიათ კითხვის ნიშნის ქვეშ და ამის შესახებ კომპანიის დამფუძნებლისთვისაც უთქვამთ. ერთ-ერთი მათგანი კომპანიიდან დათხოვნილი ხელმძღვანელია, რომელსაც მიაჩნდა, რომ ხომალდის უსაფრთხოების შესამოწმებლად შესაფერისი ტექნოლოგია მათ არ გააჩნდათ. იგი ამბობდა, რომ ნებისმიერი რისკი კატასტროფამდე მხოლოდ "წამის მეასედებით" ადრე გამოჩნდებოდა. თუმცა, მისივე თქმით, ამ საკითხებზე საუბრის დაწყებიდან მალევე სამსახურიდან გაათავისუფლეს.

რაში მოსალოდნელი კატასტროფის შესახებ საზღვაო ტექნოლოგიების საზოგადოებამაც გააფრთხილა. მას შეატყობინეს, რომ წამყვანი ექსპერტები OceanGate-ის ხომალდის უსაფრთხოების რისკებზე ერთხმად თანხმდებოდნენ.

გაფრთხილებების მიუხედავად, კომპანიამ კატასტროფა თავიდან ვერ აიცილა. აშშ-ის სანაპირო დაცვის სამსახურმა დაადასტურა, რომ ჩაძირული ტიტანიკის ნარჩენებიდან, დაახლოებით, 500 მეტრის მოშორებით, გაუჩინარებული ნავის ნამსხვრევები დააფიქსირეს.

ტურისტული წყალქვეშა ნავი, რომელიც ჩაძირული ტიტანიკისკენ მიემგზავრებოდა, 18 ივნისს გაუჩინარდა. ბორტზე მყოფ 5 ადამიანთან კავშირი წყალში ჩაშვებიდან საათისა და 45 წუთის შემდეგ გაწყდა. მას შემდეგ დაწყებული ფართომასშტაბიანი სამძებრო სამუშაოების პროცესში მაშველებმა ძლიერი ხმაურიც დააფიქსირეს, რომელიც, ერთ-ერთი ვარაუდით, აფეთქებას შეიძლება მოჰყოლოდა.