წყალქვეშა ნავი, რომელსაც ტურისტები ჩაძირული ტიტანიკის ნარჩენებთან მიჰყავდა, ატლანტის ოკეანეში 18 ივნისს გაუჩინარდა. ხომალდთან კავშირი წყალში მისი ჩაშვებიდან საათისა და 45 წუთის შემდეგ გაწყდა, ბორტზე კი 5 ადამიანი იმყოფებოდა. ამ დროიდან მოყოლებული წყალქვეშა ნავს მაშველები ეძებენ. აშშ-ის მთავრობის მიერ გავრცელებული ინფორმაციით კი, მაშველებმა ოკეანეში გაუჩინარებული წყალქვეშა ნავის ძებნისას ძლიერი ხმაური დააფიქსირეს.

სამძებრო სამუშაოებში ჩართული მაშველების თქმით, ხმები 30 წუთის ინტერვალებით ისმოდა, თუმცა იმის დადგენა ვერ შეძლეს, თუ რა იწვევდა ხმაურს. ხმაურის გაგონებიდან 4 საათის შემდეგ მაშველებმა დამატებითი მოწყობილობები გამოიყენეს და ხმების დაფიქსირება ისევ შეძლეს.

ფოტო: Getty Images

ჩაძირული წყალქვეშა ნავის სამძებრო სამუშაოებში თვითმფრინავებიც ჩართულია და ახლა უკვე იმ ტერიტორიას აკვირდებიან, საიდანაც ხმაურის დაფიქსირება შეძლეს. აშშ-ის მთავრობის განცხადებით კი, უწყვეტი ხმაური ბორტზე მყოფი ადამიანების გადარჩენის იმედს იძლევა.

გაუჩინარებული წყალქვეშა ხომალდი, რომელიც ტურისტულ კომპანია OceanGate-ს ეკუთვნის, დაახლოებით, სატვირთო მანქანის ზომისაა. ბორტზე ის 5 ადამიანსა და ოთხი დღის სამყოფ ჟანგბადს იტევს. ახლა კი დაახლოებით 27 საათის სამყოფი ჟანგბადია დარჩენილი.

შეგახსენებთ, რომ ტიტანიკი, რომელიც თავისი დროის უდიდეს გემად მიიჩნეოდა, 1912 წლის აპრილში, აისბერგთან შეჯახების გამო ჩაიძირა. ხომალდი ინგლისის ქალაქ საუთჰემპტონიდან ნიუ-იორკისკენ მიემგზავრებოდა. ჩაძირვის შედეგად, გემზე მყოფი 2 200 მგზავრიდან 1 500-ზე მეტი დაიღუპა. ჩაძირული გემი 1985 წელს აღმოაჩინეს და მას შემდეგ ატლანტის ოკეანეში ტიტანიკის გამოსაკვლევად არაერთი ექსპედიცია განხორციელდა.