ესტონეთის პარლამენტმა ისტორიული გადაწყვეტილება მიიღო — ბალტიისპირეთის სახელმწიფო ცენტრალური ევროპის რეგიონისა და პოსტსაბჭოთა სივრცის პირველი ქვეყანა გახდა, რომელმაც ქორწინების თანაბარ უფლებას მხარი დაუჭირა. შესაბამისად, ქვეყანაში ერთი და იმავე სქესის წყვილებსაც ექნებათ უფლება, კანონიერად იქორწინონ.

"[ცენტრალური ევროპის ქვეყნებს] ვეტყოდი, რომ ეს ადვილი ბრძოლა არაა, მაგრამ ქორწინება და სიყვარული მხარდაჭერას იმსახურებს", — ამბობს ესტონეთის პრემიერმინისტრი კაია კალასი გადაწყვეტილების მიღების შემდეგ, — "ბოლო 30 წლის განმავლობაში, მას შემდეგ, რაც საბჭოთა ოკუპაციას თავი დავაღწიეთ, ჩვენ ძალიან განვვითარდით".

ქორწინების თანაბარ უფლებას ესტონეთის 101-წევრიანი პარლამენტის 55-მა დეპუტატმა დაუჭირა მხარი. მიღებული გადაწყვეტილება ძალაში 2024 წლიდან შევა.

აღსანიშნავია, რომ ესტონეთში თანასწორობის მხარდამჭერი მოქალაქეების რაოდენობა ბოლო ათწლეულში თვალშისაცემად გაიზარდა. ათი წლის წინ თუ ესტონელების მხოლოდ 34 პროცენტი უჭერდა მხარს ქორწინების თანაბარუფლებიანობას, დღეს ეს რიცხვი უკვე 53 პროცენტამდეა გაზრდილი.

მიუხედავად ამისა, ესტონეთის მოქალაქეების ნაწილი — უმეტესად, ქვეყანაში მცხოვრები რუსული ეთნიკური უმცირესობა — ერთი და იმავე სქესის წყვილების ქორწინებას მიუღებლად მიიჩნევს.

ერთი და იმავე სქესის წყვილების ქორწინება დასავლეთ ევროპის ქვეყნების უმრავლესობაში დაშვებულია, თუმცა, ცენტრალური და აღმოსავლეთ ევროპის ქვეყნებში მსგავსი პრაქტიკა არაა გავრცელებული. ამის მიუხედავად, 2021 წლის ბოლოს, ევროკავშირის მართლმსაჯულების სასამართლომ მიიღო გადაწყვეტილება, რომლის მიხედვითაც ორგანიზაციის წევრმა 27-მა ქვეყანამ ლგბტქ მშობლები და მათი შვილები ოჯახად უნდა ცნოს.

ქორწინება ადამიანის ერთ-ერთი ფუნდამენტური უფლებაა, რომელიც ზრდასრულ პირს გაცნობიერებული თანხმობის საფუძველზე კანონიერი ოჯახის შექმნის საშუალებას აძლევს. თუმცა, ამ უფლებით სარგებლობა მსოფლიოს არაერთ ქვეყანაში, მათ შორის, საქართველოში, ადამიანების მხოლოდ გარკვეულ ნაწილს შეუძლია. ამის მიუხედავად, ყოველწლიურად იზრდება იმ სახელმწიფოების რიცხვი, სადაც ქორწინების თანაბარუფლებიანობას ცნობენ. მაგალითად, გასულ წელს ერთი და იმავე სქესის წყვილებს ქორწინების უფლება მიეცათ სლოვენიასა და კუბაში.