ცვალებადი სეზონები და უცვლელი სილამაზე — 10 ფოტოგრაფის თვალით დანახული ბათუმი

ბათუმი თანამედროვე საქართველოს სახეა თავისი ძველი და ახალი არქიტექტურით — უძველესი პორტით, ბოტანიკური ბაღით, ზღვისპირა ბულვარით, ევროპული მოედნებითა და ქუჩებით. ერთი სტუმრობითაც კი შესამჩნევია აქაურობის განვითარების ტემპი, გაგაკვირვებთ ზღვისა და მთების საოცარი სიახლოვე, მისი სიმწვანე კი სიმშვიდეს მოგგვრით.

ვინც შავი ზღვისპირეთში სხვა პერიოდშიც ყოფილხართ, ალბათ დაგვეთანხმებით, რომ ეს ქალაქი ოთხივე სეზონზე გამორჩეულად ლამაზია:

გაზაფხულზე ბათუმის ბულვარში გასეირნებას გირჩევთ — ამ დროს აუცილებლად დატკბებით ახლად აყვავებული მაგნოლიებისა და კამელიების სურნელით, მოცეკვავე შადრევნებით და კაფე-ლაუნჯებით, რომლებიც ბულვარს მთელ სანაპირო ზოლზე გასდევს.

ზაფხულში, თუ შუადღის მზე შეგაწუხებთ, ბოტანიკურ ბაღს უნდა ესტუმროთ, რომლის ფლორაც თავისი მრავალფეროვნებით გაგაოცებთ — აქ შეხვდებით სრულიად განსხვავებული კლიმატური და ლანდშაფტური ზონების მცენარეების უამრავ სახეობას.

შემოდგომაზე ბათუმში ველოსიპედით სეირნობას არაფერი სჯობს — ეს ის დროა, როცა შავი ზღვის ულამაზესი ხედებით, მზის ჩასვლითა და წყალზე მოლივლივე ანარეკლებით უნდა დატკბეთ.

თუ არდადეგების ბათუმში გატარებას ზამთარში გადაწყვეტთ და თოვლი მოგისწრებთ, აუცილებლად გაისეირნეთ საბაგიროთი. მისი დახმარებით ზღვის დონიდან 250 მეტრზე აღმოჩნდებით, საიდანაც შთამბეჭდავი ხედები და ბუნების ულამაზესი პეიზაჟები იშლება.

თუმცა, მოყოლილს ხომ ნანახი სჯობს, ამიტომ ქართველი ფოტოგრაფების დახმარებით ვეცადეთ, სტატიაში წელიწადის ყველა დრო გვეჩვენებინა ბათუმიდან და სასიამოვნო ვირტუალურ მოგზაურობაში დაგვეპატიჟებინეთ: