რატომ არის მნიშვნელოვანი: უკრაინასთან ურთიერთობის დაძაბვის შემდეგ, ამ ქვეყნის ლიდერები და პრეზიდენტთან, ვოლოდიმირ ზელენსკისთან დაკავშირებული პირები ხშირად ხდებიან ქართული ოცნების თავდასხმის სამიზნე.

  • მაგალითად, შარშან ირაკლი კობახიძემ არახამიას არაკაცი უწოდა და შეურაცხყოფა მიაყენა ჟურნალისტსაც, რომელიც მის განცხადებაზე ეკითხებოდა.
  • თავად არახამიაც კრიტიკულადაა განწყობილი ქართული ოცნების მიმართ.
  • ერთ-ერთ ბოლო ინტერვიუში მან თქვა, რომ საქართველოში ბუბა კიკაბიძის დაკრძალვაზე ჩამოსვლა უნდოდა, თუმცა ამერიკელმა პარტნიორებმა ურჩიეს, თავი შეეკავებინა.
  • მანვე აღნიშნა ისიც, რომ უკრაინის ელჩის დასანიშნად საქართველომ პირველი ნაბიჯი უნდა გადადგას, რაც ნიკა გვარამიას გათავისუფლება იქნება.

დეტალები: ჟურნალისტებმა ღარიბაშვილს გაუმეორეს, რა თქვა არახამიამ გვარამიასა და სააკაშვილის გათავისუფლებაზე, ელჩის დანიშვნაზე და შესაძლო სანქცირებაზე და კომენტარი სთხოვეს.

  • "ესე იგი არახამიაზე, ვიღაც არარაობაზე გინდათ, რომ გავაკეთო კომენტარი?" — თქვა პრემიერმა შეურაცხმყოფლად და დაამატა, რომ ამაზე სერიოზულად ვერ ისაუბრებს.
  • "ერთი მინდა ვთქვა, მე უკრაინას და უკრაინელ ხალხს ვუსურვებ მშვიდობას და ამ დიდი დამანგრეველი ომის მალე დასრულებას. მე ერთი მინდა ვუთხრა საზოგადოებას, რომ ეს არის კიდევ ერთი მტკიცებულება იმისა, რომ თქვენს მიერ ნათქვამი ადამიანი და ჩვენი ექსტრემისტული, რადიკალური ოპოზიცია არიან სრულ კოორდინაციაში", — თქვა პრემიერმა.
  • ამის შემდეგ კი ამტკიცებდა, თითქოს ოპოზიციისა და არახამიას ერთობის მიზანი საქართველოში ხელისუფლების გადატრიალება იყო — ეს ბრალდება მტკიცებულებების გარეშე აქამდეც არაერთხელ გაჟღერებულა.
  • "მას არავინ არ ეკითხება აქ ჩვენ, ჩვენი ხალხი, ჩვენი ქვეყანა და ჩვენი მთავრობა როგორ მოვაწყობთ ზოგადად ჩვენს საქმეს და ჩვენს პოლიტიკას. მიხედოს ბატონმა არახამიამ თავის სტაფს", — თქვა ღარიბაშვილმა.
  • რის შემდეგაც ჟურნალისტის კითხვაზე, უსურვებს თუ არა უკრაინას გამარჯვებას, თქვა, რომ ტერიტორიების დაბრუნებას უსურვებს.