რატომ არის მნიშვნელოვანი: სუდანში ჯარსა და გასამხედროებულ ძალებს (RSF) შორის შეტაკებებია — დაძაბულობა მას შემდეგ გამწვავდა, რაც მთავრობამ და RSF-მ სამოქალაქო მმართველობაზე გადასვლის შეთანხმებას ვერ მიაღწიეს.

  • არაოფიციალური მონაცემებით, დაღუპულია 500-ზე მეტი მშვიდობიანი მოქალაქე, თუმცა მათი და დაშავებულთა რეალური რაოდენობა, სავარაუდოდ, გაცილებით მეტია.
  • საერთაშორისო მედიების ცნობით, მიუხედავად ზავისა დედაქალაქ ხარტუმში საჰაერო თავდასხმები გაძლიერდა.
  • ჯარი აცხადებს, რომ ქალაქს თავს მისი გასამხედროებული მეტოქეების (RSF)-ის განდევნის მიზნით ესხმის.

დეტალები: საერთაშორისო მედიების ცნობით, მილიონობით ადამიანი რჩება დედაქალაქში, სადაც საკვების დეფიციტი ყოველდღიურად იზრდება.

  • წითელი ჯვრის საერთაშორისო კომიტეტის (ICRC) განცხადებით, ქვეყანამ დახმარების 8-ტონიანი მარაგი მიიღო, მათ შორის, სამედიცინო ინვენტარი.
  • "საომარი მოქმედებები ჯერ კიდევ გრძელდება. ICRC-ის გუნდებს სჭირდებათ კონფლიქტის მხარეთაგან უსაფრთხოების გარანტიები, რათა ეს ინვენტარი აქტიური საბრძოლო მოქმედებების ადგილას არსებულ სამედიცინო დაწესებულებებში მიიტანონ", — ნათქვამია განცხადებაში.
  • როგორც ცნობილია, საბრძოლო მოქმედებების შედეგად დედაქალაქში სამედიცინო დაწესებულებების 70%-ზე მეტი იძულებული გახდა, დახურულიყო.

გარდა ამისა, როგორც Politico წერს, დიდმა ბრიტანეთმა 29 აპრილს ბოლო საევაკუაციო ფრენა განახორციელა. მოქალაქეები, ასევე, გამოიყვანეს აშშ-მა და საფრანგეთმა.

  • ბრიტანეთის საგარეო საქმეთა სამინისტროს განცხადებით, მთავრობა ევაკუაციის შეწყვეტის გადაწყვეტილება მიიღო, მიზეზად კი ბრიტანეთის მოქალაქეების მოთხოვნის შემცირებასა და ადგილზე ვითარების არასტაბილურობას ასახელებენ.
  • გამოცემის ცნობით, ბრიტანეთმა 21 რეისით 1 888-ზე მეტი ადამიანის, ხოლო საფრანგეთმა 1 000-ზე მეტი მოქალაქის ევაკუაცია შეძლო.
  • აშშ-ის განცხადებით, ინტენსიური მოლაპარაკებების წყალობით, აშშ-ისა და უცხო ქვეყნების ათასობით მოქალაქემ შეძლო სუდანის დატოვება.
  • "მოვუწოდებთ სუდანის შეიარაღებულ ძალებს და RSF-ს, შეწყვიტონ ბრძოლა, რომელიც საფრთხეს უქმნის მშვიდობიან მოსახლეობას.

მოქალაქეები სუდანიდან გაქცევას ცდილობენ

ფოტო: EPA-EFE/REX/SHUTTERSTOCK

ჰუმანიტარული ზავი: დაპირისპირებულმა მხარეებს შორის ჰუმანიტარული ზავი, რომელიც კვირას უნდა დასრულებულიყო 72-საათით გახანგრძლივდა.

  • ის ჰუმანიტარული დერეფნების გახსნასა და მოქალაქეებისთვის უსაფრთხოდ გადაადგილების შესაძლებლობის მიცემას ისახავს მიზნად.
  • მიუხედავად ზავისა, დედაქალაქში საბრძოლო ვითარება დაძაბული რჩება და კვლავ ისმის სროლების სხმა.