დღეს შინაგან საქმეთა მინისტრი გიორგი მღებრიშვილი ქართული ოცნების დეპუტატებს შეხვდა. როგორც შეხვედრიდან გამოსვლის შემდეგ დეპუტატების ნაწილმა ჟურნალისტებთან აღნიშნა, საუბარი შეეხო ყველა მიმდინარე აქტუალურ თემას.

სოციალ-დემოკრატების თავჯმდომარემ, გია ჟორჟოლიანმა განაცხადა, რომ დეპუტატებმა და შს მინისტრმა იმსჯელეს საპატრულო პოლიციაში მიმდინარე პროცესებზე, ასევე მუხტარლისა და ბირჟა მაფიის თემაზე.

საპარლამენტო უმრავლესობის ლიდერმა არჩილ თალაკვაძემ განაცხადა, რომ აღნიშნულ თემებზე ოპოზიცია წინასწარ იქმნის ნეგატიურ განწყობებს, ასევე, ის მიიჩნევს, რომ მღებრიშვილი პარლამენტში მოსვლისგან და საპარლამენტო უმცირესობასთან შეხვედრისგან თავს არ შეიკავებს:

"ყველა მიმდინარე საქმეზე, მათ შორის იმაზე, რომელზეც საჯარო ინტერესი არის მაღალი, დაისვა შეკითხვები და მინისტრმაც შესაბამისი ინფორმაცია, რომლის თქმის უფლებაც მას კანონის ფარგლებში ჰქონდა, მოგვცა".

ოპოზიციის გარდა, უკვე რამდენიმე კვირაა, საქართველოში მოქმედი ჟურნალისტები უშედეგოდ ითხოვენ ხელისუფლების წარმომადგენლებთან შეხვედრას, რათა მიიღონ მუხტარლის საქმესთან დაკავშირებით არსებულ კითხვებზე პასუხი. ჟურნალისტებმა 19 ივნისს პრემიერსაც მიმართეს წერილობითი განცხადებით.