საქართველოს საპარლამენტო უმრავლესობა უახლოეს დღეებში შინაგან საქმეთა მინისტრს, გიორგი მღებრიშვილს შეხვდება საქართველოდან გატაცებული აზერბაიჯანელი ჟურნალისტის, აფგან მუხტარლის საქმესთან დაკავშირებით. მდინარაძის თქმით, დეპუტატები მინისტრისგან მიიღებენ ინფორმაციას გამოძიების მიმდინარეობის შესახებ.

"ამ საქმის გამოუძიებლობა ნამდვილად ცუდად აისახება ქვეყნის საერთაშორისო იმიჯზე, ამიტომ ძალიან განსაკუთრებული ვალდებულება აქვთ სამართალდამცავ ორგანოებს ამ საქმის დეტალური გამოძიების, რათა ყველა კითხვას პასუხი გაეცეს. თუ შედეგები არ იქნება დამაკმაყოფილებელი და კითხვებზე პასუხი არ გაეცემა, მხოლოდ ამის შემდეგ შეიძლება კომისიის შექმნაზე მსჯელობა", - უთხრა ჟურნალისტებს მამუკა მდინარაძემ.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.

საქართველოში მოქმედი ჟურნალისტები უკვე რამდენიმე კვირაა, უშედეგოდ ითხოვენ ხელისუფლების წარმომადგენლებთან შეხვედრას, რათა მიიღონ მუხტარლის საქმესთან დაკავშირებით არსებულ კითხვებზე პასუხი თუმცა, უშედეგოდ. ჟურნალისტებმა 19 ივნისს პრემიერსაც მიმართეს წერილობითი განცხადებით.