რესპუბლიკურ საავადმყოფოსთან აქციაზე მივიდნენ სხვადასხვა კლინიკის თანამშრომლები, რომლებმაც კოლეგებს თანადგომა გამოუცხადეს.

რატომ არის მნიშვნელოვანი: 22 მარტს რესპუბლიკურის თანამშრომლები ითხოვდნენ, რომ არ შეცვლილიყო კლინიკის ადგილმდებარეობა.

  • ამბობდნენ, რომ ჯანდაცვის მინისტრმა შენობის ნგრევა მათთვის სრულიად მოულოდნელად, ახალი მდებარეობისა და კონცეფციის გაურკვევლად დააანონსა.
  • მათივე თქმით, ერთი წლის წინ რესპუბლიკურის მედპერსონალს სრულიად განსხვავებული ინფორმაცია მიეწოდა შენობის რეაბილიტაციაზე.
  • ჯანდაცვის მინისტრის მოადგილემ, თამარ გაბუნიამ რესპუბლიკური საავადმყოფოს კომერციალიზაცია გამორიცხა.
  • 29 მარტს საავადმყოფოს თანამშრომლებმა აქციაზე სამი ძირითადი მოთხოვნა გააჟღერეს, მათ შორის, პრემიერმინისტრთან შეხვედრა.
  • საკითხზე ისაუბრეს ამირან გამყრელიძემ და ეკატერინე ტიკარაძემ.

ზურაბ აზარაშვილმა განაცხადა, რომ იღებენ სრულ პასუხისმგებლობას თანამშრომლების დასაქმებაზე და იმ ანაზღაურების გადახდაზე, რომელიც დააწესეს.

  • "იმ შემთხვევაში, კი თუ მათ ვერ დავასაქმებთ, ჩვენ მათ ხელფასს მაინც გადავუხდით. ჩვენ ამას ყველანაირი ხელშეკრულებებით გავამყარებთ", — თქვა აზარაშვილმა.

რას ამბობენ ექიმები: ფორმულასთან საუბრისას ისინი ამბობენ, რომ ხელისუფლების მიერ მიღებული გადაწყვეტილებები არ შეესაბამება სამართლიან მეთოდებს.

  • ქირურგი მალხაზ გოგუა ამბობს, რომ საავადმყოფოს რეაბილიტაცია ისე უნდა მოხდეს, რომ არ შეწყდეს სამკურნალო პროცესი და შენარჩუნდეს რესპუბლიკური საავადმყოფოს კოლექტივი.
  • "მინისტრმა თქვა, რომ არსებული რეაბილიტაციის გეგმით გაკეთდა კოვიდის დროს რემონტი დაა ახლა ამ გეგმის გამოყენება არ შეიძლება, ვინაიდან არ შეესაბამება სტანდარტს, ეს განცხადება არაა ზუსტი", — თქვა გოგუამ.
  • ექიმი შალვა ჭოველიძეს თქმით, მას ძალიან უყვარს რესპუბლიკური საავადმყოფო და როგორც ყველა ისე თავადაც მას მედიცინის ცენტრად თვლის.
  • "დღეს მოვედით აქ, რომ მხარი დავუჭიროთ აქციას და შესაბამისად, გვინდა, რომ გავაგრძელოთ აქ მუშაობა", — თქვა ექიმმა.
  • "როგორ შეიძლება ამ საავადმყოფოს დანგრევა, ეს არის ქართული მედიცინის ისტორია. ძალიან ვთხოვ მთავრობას, მოვიდეს გონს. ასე არ შეიძლება ყველაფრის განადგურება, ესაა ისტორია. ეს მთავრობა ცრუობს. იმიტომ, რომ სად წაიყვანენ ამდენ ექიმს. მე, მაგალითად, სად უნდა წავიდე? ვერსად წავალ, წასასვლელი არ მაქვს.უცხო გარემოში არავინ მიმიღებს", — განაცხადა ექიმმა ლილი ჯაფარიძემ.